Буряадай ехэ нааданай дүүрэмсээр, «Алтаргана-2020» нааданай лауреадууд болоһон нютагайхидаа ага-хангилайхид дулаахан оршондо ёһолон хүндэлбэ.
Туйлай ехэ хэмжээнэй һайндэр гурбан үдэрэй туршада буряад угсаатанай һонирхол татаа, зүрхэ сэдьхэлыень хүлгөөгөө. Нааданай дүнгүүдэй татагдахада, нютаг бүхэнэйхин хүбүүд басагадайнгаа амжалтануудаар омогорхоо ёһотой. Энэнь зүбөөрөө. «Алтарганын» лауреат бүхэн буряад арадай түүхэдэ оробо ха юм.
Харин мүнөө жэлэй «Алтарганын» гол шан болохо гурбан «Нива-трэвел» авто-унаагай хоёрынь Могойтын аймагай Ага-Хангил нютаг руу ошоол! Мори урилдаанай Ехэ шанда хүртэхын түлөө 16 модоной зай гаталһан нютагай үүлтэрэй морид сооһоо Ага-Хангилай Сахилгаан хүлэг (шодоогынь Рабдан Цыденов, эзэниинь Даши Нимаев, һоригшонь Очир Пагмаев) түрүүлжэ ерэбэ хамнай. Абарга бүхын нэрэ солодо хүртэһэн Ага-Хангилай хүбүүн, бүхэ барилдаагаар Оросой суглуулагдамал можын гэшүүн Балдан Цыжиповэй туйлалтаар омогорхонгүй яахаб? Лауреат болоһон «Хори буряадай түүхэнүүд» номой автор Аюша Эрдынеев (Тенчой) энэ нютагһаа гарбалтай. Мүн нютагай һээршэд, шагайшад, модельернүүд – хамта дээрээ хорёод илагшад: нютагай зон болон Ага-Хангилһаа уг гарбалтай аад, гадуур ажаһуудаг, "би Ага-Хангилайб" гэжэ, нютагайнгаа нэрэ һүлдэ үргэжэ ябаһан зон хүндэлэн ёһологдоо бшуу.
Иимэ хэмжээ ябуулга эмхидхэхэ үүсхэл нютагай захиргаан (толгойлогшонь Жаргалма Дашиева) гаргаһан байна. Эмхидхэлэй ажал соёлой байшанайхид (захиралынь Ханда Чимитова), нютагай эдэбхитэд болон лауреадуудай түрэлхид ябуулалсаа.
Дарима БАЗАРОВА.
Ханда Чимитовагай фото.
