«Агын Арбат» дээрэ дэлгээгдэhэн үзэсхэлэн бүхэн өөрын онсо шэнжэтэй, hонин байгаа. Тэдэнэй нэгэн – хуушан монгол хэлэ бэшэгэй каллиграфиин үзэсхэлэн. Yбэр Байгалай хизаарай буряад соёл хүгжөөлгын түбэй методист Янжима Дармаевагай ударидалга доро хуушан монгол хэлэ бэшэгтэ hураhан басагадтай үзэсхэлэндэ уулзабабди.
Янжима Цывановна «Алтаргана» нааданда ажалаараа сүлөөгүй тула ондоо хэмжээ ябуулгада байгаа. «Нёдондо апрель hараhаа намар болотор Янжима Цывановнада ябажа, 7 басагад хуушан монгол хэлэ бэшэгтэ hураhан байнабди. Элинсэг хулинсагайнгаа эхэ хэлэн дээрэ уншажа, бэшэжэ hурахада, ехэл таатай зохид байна. Мүн хажуугаарнь хуушан монголой гоёор бэшэлгын (каллиграфия) конкурс, үзэсхэлэнүүдтэ эдэбхитэй хабаададаг болообди. Саарhан дээрэ гоёор бэшэжэ hуралга гээшэ баhал өөрын оньhотой. Жэшээнь, биирэ зүбөөр бариха, бэхэдэ биирэ норгоходоо, баhал дундыень олохо, саарhан дээрэ үзэг бэшэхэдээ, хэр шангаар биирэ дарахаб гэхэhээ эхилээд, оролдолго хэрэгтэй бшуу», - гэжэ Могойто тосхондо ажаhуудаг Дулма Болотова хөөрэбэ.
«Та юундэ хуушан монгол хэлэ бэшэгтэ hураха гэжэ шиидээбта?» – гэhэн асуудалда Дулма Болотова иимэ харюу үгэбэ: «Би Ушарбай нютагай Доржиханда Эрдынеевада ябажа, hүнэй архи нэрэжэ hураа hэм. Энэ hуралсалаа дүүргэхэдээ, hүнэй архи нэрэдэг болооб. Архиин амhарта дээрэ хуушан монгол хэлээр гоёор бэшэдэг hаа гэжэ бодомжолдог болоо hэм. Тиигэжэ байтарни, Агада Янжима Цывановна хуушан монголоор бэшэжэ hургана гэжэ дуулахадаа, ехэтэ баярлааб. Мүнөө амhартанууд дээрэ хуушан монголоор гоёор бэшэжэ hуранаб».
Буряад орондо, Эрхүүгэй мо-жодо хуушан монгол хэлэн дээрэ гоёор бэшэлгын hуралсал эмхидхэгдэжэл байдаг, энэ сэдэбээр хаа-хаанагүй конкурс, фестивальнууд үнгэргэгдэнэ. Агын талада хуушан монголоор гоёор бэшэдэг басагадай урган бодожо байhаниинь hайшаалтай даа.
Валентина ЦЫРЕНЖАПОВА.
Авторай фото.
