Тойрогой Захиргаанай социальна хүгжэлтын болон Россиин МВД-гэй «Агинский» аймагууд хоорондын таһагуудай эмхидхэһэн энэ мүрысөөндэ дүн хамта 12 можо мүрысөө юм.
Хэмжээ ябуулгын үедэ хабаадагшад ами наһанай тэнтэй үйлэ хэрэгүүдтэ Эхэ ороноо хамгаалһаар, алтан дэлхэйтэеэ хахасаһан зонойнгоо дурасхаал хүндэлжэ, минутын туршада дуугай зогсоо. Россиин МВД-гэй «Агинский» аймагууд хоорондын таһагай сагдаанар «Юный друг полиции» отрядуудта ородог эдиршүүлэй гурим журамтай, үетэнэйнгөө дунда хуули эбдэлгэ һэргылхэ хэрэгтэ харюусалгатайгаар хандажа, хубитаяа оруулдаг тухайнь тэмдэглээд, хабаадагшадта амаршалгын үгэнүүдые хэлээ, амжалта хүсөө.
Эдиршүүл хоёр үдэрэй үргэлжэлэлтэй слёдто илахын тула отрядтаяа танилсуулаа, ажаябуулга болон дүй дүршэл тухайгаа хөөрөө, Агын аймачна милиисын түүхэ, уголовно болон административна хуулинуудые мэдэлгээр шалгалта гараа, Калашниковай буу шадамар бэрхээр задалха, суглуулха, пневматическа буугаар мэргэнээр буудаха даабаринуудые дүүргээ, хэр һайн физическэ болон жагсаалда бэлэдхэлтэй байһанаа харуулаа. Мүн тэдэ мушхамал таталгаар мүрысэһэн байна.
Хуули буса ябадал һэргылхэ, элүүр энхэ байдал сахилга нэбтэрүүлхэ зорилгонуудтай хэмжээ ябуулгын дүнгүүдээр, Урда-Агын дунда һургуулиин можо тон һайн мэдэсэтэй, бэлэдхэлтэй байжа, VI слёдой абарга болоо. Харин Могойтын 2-дохи ба 3-дахи дунда һургуулинуудай можонууд тус тустаа шангай 2-дохи ба 3-дахи һууринуудта хүртэбэд. Россиин МВД-гэй «Агинский» аймагууд хоорондын таһагай дарга, полициин полковник Сокто Эрдынеев илагшадта кубок, диплом болон үнэтэ бэлэгүүдые барюулаа.
Долгор РАДНАБАЗАРОВА.
