Тала газарай хүнүүд тарбага боожо, амтатай эдеэ хэдэг бэлэй.
Тарбаганай тархи таһа отолжо хаяад, арһыень үбшэнгүй, гэдэһыень ерэнгүй, бүхы доторыень гаргаад, хүзүүнэйнь нүхөөр һуулижа, яһыень ходо татажа абаад, досоонь мангир, дабһа хэдэг. Тиигээд шулуу халаажа халаажа, досоонь хээд, тарбаганайнгаа хүзүү таһа уяад, тэрэнээ газар дээгүүр мухарюулдаг, шулууень һэлгэдэг һэн. Тиигэһээр байтарынь, тарбаганай үһэн халсаржа унадаг, эндэ тэндэнь үлэһэн үһыень хуйхалдаг бэлэй. Тиигэһэн хойноо бэлдээд байһан нүхэн соо халуун бурма хээд, бурма дээрээ тарбагаяа табяад, дээрэһээнь баһа бурмаар булаад, үшөө дээрэһээнь шоройгоор хушадаг юм. Удаань 2-3 саг тухай байлгаад абажа эдихэдэ, ехэ амтатай хоол болодог байгаа. Досоонь уһа хээшьегүй һаа, шүлэн бии болошоһон байгша бэлэй. Тарбаганай гэдэһэ доторыень хэршээд, досоонь хэлсэдэг һэн. Тэрэнь дамбар гэжэ нэрэтэй юм.
Тарбага хабшаха гээшэ иимэ юм. Гэдэһыень хаха ерээд, үбсүүень хадаад дэлгээхэ, үһыень хуйхалха, тиигээд нүхэн соо дээрэ дороһоонь халуун шулуунай хоорондо хабшажа булаад орхиходонь болошодог юм.
«Лодон багшын дэбтэрһээ» номһоо.
