Агын Буряадай тойрогто Эсэгэ ороноо хамгаалгын Агууехэ дайнда хабаадаһан хоёр ветеранууд мүнөө мэндэ байна. Хэд бэ гэбэл, Дулдаргын тойрогой Балжана нютагай 100 наһатай Георгий Тимофеев ба Ага тосхондо ажаһуудаг 99 наһатай Самбу Базаров болоно.
Хүндэтэ ветеранууд Эсэгын дайнай үедэ Советскэ Союзай зүүн хилэ япон миллитаристнуудһаа хамгаалаа. Хүн бүхэниинь бидэнэй амгалан байдалай түлөө эрэлхэг зоригтойгоор дайлалдаа.
Георгий Тимофеев арбан найма наһатай байхадаа, сэрэгэй албанда татагдажа, Москвагай Внуково аэродромой 10-дахи гвардейскэ автотранспортна дивизидэ алба хааһан байна. Һүүлдэ Горький хотодо радистын мэргэжэл шудалжа, старшина болоһон. Дайнһаа бусаад, тэрэ нютагтаа хүүгэдэй гэртэ, һургуулида ажаллаа, соёлой байшанай захирал ябаһан. Эсэгын дайнай 2-дохи шатын орденоор, ойн баярай медальнуудаар шагнагдаһан юм. Үнгэрэгшэ жэл «Дулдаргын аймагай хүндэтэ эрхэтэн» болоо.
Хүндэтэ ветеран Владимир ба Валерий хүбүүдэйнгээ хайхарамжа доро ажаһууна. Һая болотор Георгий Тимофеев дунда һургуулида һурагшадтай уулзажа, һонирхоһон асуудалдань харюусадаг байгаа. Мүнөө үхибүүд ветеранай гэртэ ерэжэ хамһалсадаг гээшэ. Байгша оной январь һарада зуун наһа хүрэһэн дайнай ветеран балалайка дээрэ наадажа, дуу дуулажа, ерэһэн айлшадые урмашуулжа байдаг.
Агууехэ Эсэгын дайнай ветеран Доржын Базарай Самбу аха 1927 ондо Зугаалай нютагай Зүүн Шибэеэ гэжэ газарта түрэhэн намтартай. Самбу ахын 14 наhатай байхада, дайн эхилhэн байгаа. 17 наhаяа гүйсэжэ, 1944 оной декабриин 3-да сэрэгэй албанда мордоhон. Сэрэгэй мэргэжэлээр, тэрэ тоодо мэргэн буудагшын курс гараhан юм. Сэрэгшэ 64-дэхи стрелково полкын частьда мэргэн буудагшаар ябаа. 1950 ондо 165-дахи танкова батальоной бэшээшээр хүдэлһэн. Гэртээ «За победу над Японией» ба ойн баярай медальнуудтай бусаhан юм. Амгалан сагта Эсэгын дайнай II шатын орденоор, Жуковай, «Германиие илаhанай түлѳѳ» гэhэн медальнуудаар шагнагдаhан. Аргали нютагай Жанчуева Удамбра басагантай 1952 ондо гэр бүлэ боложо, дүрбэн үри хүүгэдые хүл дээрэнь үндылгэжэ, зоной зэргэ хүмүүжүүлээ. Тойрогой хүдѳѳ ажахын хүтэлбэридэ диспетчер, даргын жолоошоноор ажаллаһан. Удаань тойрогой больницада хамhабариин ажахын бухгалтераар 32 жэлэй туршада хүдэлһэн юм. Тиихэдэ «Ударник коммунистического труда», «Победитель социалистического соревнования 1973 года», «Ветеран труда» гэhэн хүндэтэ нэрэ зэргэнүүдтэ хүртэhэн байна. Самбу аха наhанай амаралтада гаратараа, Агын үүлтэртэ эмхидэ 11 жэлэй туршада ахамад нягталан бодогшоор ажаллаа бэлэй. Дайнай ветеран Самбу Базаров мүнѳѳ жэлэй май һарада 99 наhаяа гүйсэбэ. Агуу Илалтын 81-дэхи жэлэй ойн баяр хүнгэн, энхэ элүүр зандаа угтажа байна. Мүнөө Шэтэ хотодо аша зээнэрэйнгээ хажууда ажана тэнюун ажаһууна.
