Намтарһаань
Хажидма Аюржанаева 1951 ондо Шэтын можын Могойтын аймагай Ага-Хангил нютагта түрэhэн. Эсэгын дайнай хатуу сагта, һүүлээрньшье хамтын ажалда, һаалида таһалгаряагүй хүдэлһэн Аюрова Цымпилма эжыгээ дахажа, хара багаһаа хүдөөгэй ажалай амта таниһан. Балшар наһанһаа түрэл нютагайнгаа үзэсхэлэнтэ шарай хаража, ажалша, дууша нютагайхидайнгаа, түрэлэйхидэйнгөө хонгёо һайхан аялга шагнажа, хүгжэм дуунда дуратай болоо. Ажахын түрүү хонишон ябаһан Цырендулма абгайнь, эгэшэ дүүнэрынь, бүлэнсэр, үри һадаһадынь булта дуунда улигтай юм.
Наһаараа һаалида хүдэлжэ, гүрэндэ ехэ hү тушаалсаһан Банзаргашын Цымпилма ба Бутид абгайнарынь мандолинаар бэрхээр наададаг байгаа. Ажалай забһарта тэдэнэйнгээ мандолинын хүбшэргэ хүдэлгэжэ, гоё хүгжэм гаргахадань, һонирхон шагнадаг һэн. Тиигэжэ һургуулиин наһандаа мандолинаар наадажа һураа. «Цымпилма эжымнай морин тэргээр Наринай фермэ ошохо замдаа Дондог Эри уулын баруун хажуугай элhэтэйхэн харгыгаар агтаяа бүншүүлхэдээ, иигэжэ дууладаг hэн:
Улаанхан занданаа
ургуулһан
Уhанхан булагай
һайханиинь бэ.
Уладай байдалые
hайжаруулһан
Улаанхан партиимнай
һайханиинь бэ.
Эжымнай аалихан, намдуухан, гоёхон хоолойтой hэн», - гэжэ Хажидма Бальжинимаевна эжыгээ дурсана.
Зохёохы зам, ажал хүдэлмэри
1967 ондо Ага-Хангилай найман жэлэй һургуули түгэсхөөд, Улаан-Yдэ хотын Пётр Ильич Чайковскиин нэрэмжэтэ хүгжэ-мэй училищиин ород арадай хүгжэмэй зэмсэгүүдэй таhагай домбрын ангида Ага-Хангилай 3 басагад ороо бэлэй. Эдэ хэд бэ гэхэдэ, Сэсэгма Долсонова, Ешин-Хорло Гомбоин ба Хажидма Аюржанаева гэгшэд болоно. Тэдэ Улаан-Yдын хүгжэмэй училищида 4 жэлэй туршада һуража, хүгжэмшэнэй мэргэжэлтэй боложо гараа.
Украинаһаа ерэһэн Мелихов Леонид багшань оюутадта һайн эрдэм мэдэсэ дамжуулжа шадаһан. Тэрэ сагые Хажидма Бальжинимаевна иигэжэ дурсана: «Намтай суг hураhан Роза Барсукова (Yзөөн нютаг), Цымжидма Базарова, Цыбигжаб Цыденова (Ушарбай) гэгшэд Леонид Константинович багшада заалгаhамди. Ешин-Хорло Гомбоин Сэсэгма Цымпилова (Долсонова) хоёр Анна Ивановна Федченко багшын ударидалга доро hураһан. Сэсэгма домбро дээрэ тон бэрхээр наададаг hэн. Бидэнэй училищи ерэхэдэ, буряад арадай зэмсэгүүдэй таһаг гэжэ үгы байгаа. Хожомынь чанза дээрэ өөһэдөө наадажа hураа hэмди».
