Ага тосхоной дунда һургуулинууд эрдэм мэдэсын үдэр заншалта ёһоор тэмдэглэбэ. «Ага тосхон» хотын тойрогой толгойлогшо Болот Аюровай тэмдэглэһээр, Ага тосхоной дунда һургуулинуудта 4060 һурагшад партын саана һуубад. Тэдэнэй тоодо 288-иинь анха түрүүшынхеэ һургуулиин богоһо алхаба.
Россиин Баатар Эдуард Норполовой нэрэмжэтэ 5-дахи дунда һургуулида 1-дэхи ангида 30 хүүгэд ороо. Тэдэнэй багшанар Гэрэлма Цыцыкова ба Снежана Манзаракшаева болоно.
Үнгэрэгшэ жэл 5-дахи дунда һургуули түрүүшынхеэ үүдэеэ сэлижэ, һурагшадаа угтан абаа бэлэй. Мүнөө энэ һургуулиин талмай дээрэ түрүүшын хонхо дахяад жэнгирээ. Баяр ёһололой хэмжээндэ Росси гүрэнэй, Үбэр Байгалай хизаарай, Агын Буряадай тойрогой тугуудые бодхоохо эрхэдэ эрхим һурагшад: һургуулиин ба аймагай олимпиадануудай, «Шаг в будущее» эрдэмэй-дүршэл абалгын хуралдаанай илагша, ниитэ ажаябуулагша, 11-дэхи «Бета» ангиин Кристина Лубсанова, боксоор тойрогой ба бүхэроссиин мүрысөөнүүдэй илагша, Алас Дурнын федеральна тойрогой мүрысөөндэ хоёр удаа илаһан 11-дэхи «Бета» ангиин Зандан Жамбалов, «Лучший бадминтон Агинского округа-2025» гэһэн кубок шүүһэн, хүүгэдэй бүхэроссиин «Орлёнок» түбтэ амарха эрхэдэ хүртэһэн, физикэ ба тоо бодолгоор олимпиадануудта илаһан 11-дэхи «Альфа» ангиин һурагша Намжил Дондоков гэгшэд хүртөө.
