Забайкалиин хизаарай мал эмшэлэлгын албанай ветеран, «Эсэгэ оронойнгоо урда габьяагай түлѳѳ» гэhэн II шатын медаляар шагнагдаhан Бато-Очир Дармаевич Базаров үнгэрэгшэ 2016 ондо 75 жэлэйнгээ ой тэмдэглээ. Тэрэнэй наhанай нүхэр, Россиин Федерациин габьяата ветеринарна врач Анна Бальжинимаевна Базарова байгша ондо мүн лэ 75 жэлэйнгээ ойн баяр тэмдэглэбэ. Энэ бүлын мал аргалха хэрэгтэ зорюулhан хамтын хүдэлмэриин стаж 100 гаран жэл болоно.
Бато-Очир Дармаевич Базаров 1941 ондо Буряад Республикын Яруунын аймагай Тэлэмбэ нютагта түрэн үндыhэн. Анна Бальжинимаевна 1942 ондо түрэhэн, Харымай аймагай Дарhан нютагта тоонтотой. 1961 ондо Улаан-Үдэ хотодо Буряадай гүрэнэй хүдѳѳ ажахын институдай ветеринарна факультедтэ орожо танилсаад, 1963 ондо гэр бүлэ болоhон. 1966 ондо институдаа урагшатайгаар түгэсхэжэ, Шэтын можо руу эльгээгдээд, Ононой аймагай Доодо-Саhаша нютагта 2 жэлэй туршада хүдэлhэн.
Холын 1968 ондо Базаровтанай залу бүлэ тэрэ үеын Могойтын аймагай ахамад ветеринарна врач Мичикдоржи Гармаевай урилгаар Ушарбай нютаг хүдэлхѳѳ ерэhэн юм. Огто танигдаагүй, түрэл гарал, танилгүй хариин нютаг зѳѳхэ үедѳѳ Бато-Очир нүхэртѳѳ хэлэhэн байгаа: «Эндэ табан жэл хүдэлѳѳд, түрэл нютаг Тэлэмбэеэ, Яруунаяа бусахаб». «Тэрэ табан жэлынь табин жэлэй туршада үргэлжэлжэ байна», - гээд Анна Бальжинимаевна хошонлон тэмдэглэнэ. Хахад зуун жэлэй туршада түрэл болоhон Ага нютагтаа хуби заяагаа, бүхы хүсэ шадалаа, эрдэм мэдэсэеэ зорюулан ажаhууна.
- Тэрэ үедэ зѳѳжэ ерэхэдэмнай, маанадые ехэ hайхан сэдьхэлтэй хүнүүд, ажалша бэрхэ ба тусгаар эбтэй эетэй коллектив угтажа абаhан юм, - гээд Анна Бальжинимаевна үргэлжэлүүлнэ. Алишье талаар дүнгэн туhалжа, дүй дүршэлѳѳрѳѳ, эрдэм мэдэсээрээ хубаалдажа, заяанаймнай эхин замда түшэг тулга болоhон хүнүүдые бүхы наhан соогооhайханаар дурсажа ябадагбди. Ажахын түрүүлэгшэ Ц.Б. Батоев, ветеринарна фельдшер Бадмаев Ц.Б, РСФСР-эй габьяата зоотехник Б.Ц. Цыбиков, РСФСР-эй габьяата рационализатор Д.Д.Дугаров, Социалис Ажалай Герой Б.Д. Доржиева г.м. үшѳѳ олон хүнүүд наhандамнай жэшээ боложо үгэhэн. Ёhото «хүлтэй энциклопединүүд» гэжэ тэдэниие нэрлэдэг бэлэйбди.
Бато-Очир Дармаевич - Ушарбайн ветеринарна участогые даагшаар, харин Анна Бальжинимаевна забайкалиин нарин нооhото үүлтэрэй хони үдхэлгын фермэдэ малай аргашанаар хүдэлжэ эхилhэн байна.
1969 ондо залу ветеринарнууд оюун бэлигтэй урлан нарижуулагша Доржи Дугаровтай суг хамта Шэтын можодо хайшалуулhан хонидые дезинфекции хэжэ угаалгын түрүүшын тусхай оньhото ванна зохёон бүтээhэн юм. Тэрэнииень можын бүхы ажахынуудай түлѳѳлэгшэд ерэжэ хараад, саашадаа, ушарбайнхидай жэшээгээр, хаахаанагүй тиимэ хэрэгсэлнүүд бии болгогдоhон түүхэтэй...
Дэлгэрэнгыгээр 24-дэхи дугаарта.
