Десантна-добтолгын сэрэгүүдэй домог болоhон гээд тэрэниие Оросой Уласай сенаторнуудай нэгэн нэрлэhэн байна, юундэб гэхэдэ хүнүүд хойноhоонь этигэн ябана. Тагнуулай батальоной командир, подполковник Дашибал Мункожаргалов 76-дахи гвардейскэ десантна-добтолгын дивизиин бүридэлдэ сэрэгэй тусхай үйлэ хэрэгэй эгээн эхинhээ алба хаажа ябана.
   Дашибал Мункожаргалов хадаа адуушан Цырендоржи Дугарович ба багша Анна Сергеевна Мункожаргаловтанай гэр бүлэдэ дундахи үхибүүниинь боложо, Могойтын аймагай Сагаан-Уула hууринда – Баатарнуудай нютагта түрэhэн байна. Сагаан-Уула – Советскэ Союзай Герой Базар Ринчиногой болон суута снайпер, Улаан Тугай орденой кавалер Тогон Санжиевай, тиихэдэ Социалис Ажалай Геройнууд – хонишод Дамша Юндуновай, Михаил Болотовой, Бабудоржи Михайловай, hаалишан Цыбжит Юндуновагай тоонто нютаг гэжэ мэдээжэ.
Ерээдүйн Герой нютагайнгаа hургуули мүнгэн медальтайгаар түгэсхөө. Сагаан-Уула нютагай арадай музей даагша, Оросой Уласай ниитэ болбосоролой хүндэтэ хүдэлмэрилэгшэ Цыцыгма Цырендашиевагай хөөрэhөөр, Дашибал Мункожаргалов бүри үхибүүн балшар наhанhаа тон журамтай, нарин нягта һэн. Бүхы юумэниинь эмхи гуримтай байха. Бүхы юумэеэ саг соонь, ёhо руунь зүбөөр хэхэ. Эдэшье шэнжэ шанарнуудайнь сэрэгшэ болохо замдань ехэхэн үүргэ дүүргэhэниинь лабтай. Физикээр, тоо бодолгоор тойрогой олимпиадануудта нэгэтэ бэшэ шангай hууринуудта хүртэhэн гээшэ. Оросой Уласай физическэ культурын эрхим Валерий Содбоев Цырендоржи Намсараев хоёр hоригшодой хүтэлбэри доро сүлөөтэ барилдаагаар бэеэ һоридог байгаа.

You have no rights to post comments