Ажалша бүлэ Доодо Бургааһата гэжэ мал харахада зохид газарта таряашанай-фермерскэ ажахы байгуулжа, мал арьбадхажа, таряа ургуулжа, үнэхөөрөөл, ажалай хүлһэ адхан ажалланад. Буусын эзэн Даба Цыремпиловэй абатан «Улаан Одон» ажахын түрүү малшад, һүүлдэ үнгэрэгшэ зуун жэлэй ерэ гаран онуудта фермернүүд ябаһан юм. Даба аха Долгорма эгэшэ хоюулан олон хүүгэдтэй бүлэдэ үндыһэн, хара багаһаа хүдөөгэй хара ажал хэжэ хүдэржэһэн. Долгорма Батомункуевна хүлөө шоройдоһоор хони дахажа, нарай хурьгадые намнаһаар үндыһэн. Һургуулида дунда ангинуудта һуража байхадаа, хони хайшалалгын ажалда ябажа, нооһо хиргадаг һэн. Намартаа үбһэ сабшалгада ябаха. Цыремпиловтэнэй бүлэ мал хараха, үдхэхэ, ажаллаха дүршэлөө хүүгэдтээ дамжуулна. Хабарай дулаахан сагта тэдэнэй даашын үнеэд түрэжэ, нарай тугалнууд мөөрөөгөөрөө талые сууряатуулна. Шэнэ түл абалгын сүлөөгүй хүдэлмэринүүд ябуулагдана бшуу. Фермерэй бүлын ажал хэрэгүүд эмхи гуримтайгаар хэгдэнэ гэжэ хараад ойлгохоор байгаа һэн.

You have no rights to post comments