- Энхэ Баин-Жаргалович, буряад үндэһэн соёлой автономи ударидахын тула эмхидхэгшын талаан бэлигтэй, соёлдо хабаатай хүн байха ёһотой…
- Тиимэ, би соёлой мэргэжэлтэйб. Пётр Ильич Чайковскиин нэрэмжэтэ Улаан-Үдын хүгжэмэй колледжын дирижёрой-хоорой таһагта 2002 ондо орожо һураад, 2006 ондо «Арадай хоорой хүтэлбэрилэгшэ» гэһэн мэргэжэлтэй дүүргээб. Колледжын hүүлээр сэрэгэй албанда ябааб, тиигээд Улаан-Үдэдэ Уласай арадай урлалай түбтэ буряад арадай аман зохёолой мэргэжэлтэнээр хүдэлөөб. Һүүлээрнь ажалаараа Северобайкальск хото зөөгөөб, тэндэ дүрбэн жэлэй туршада арадай «Гэсэр» ансамблиин хүтэлбэрилэгшөөр хүдэлөө һэм. 2011 ондо Зүүн Сибириин гүрэнэй соёлой ба урлалай академидэ һуража, арадай-соёлой түбэй хүтэлбэрилэгшэ-багшын мэргэжэлтэй болоһон байнаб.
- Новосибирск хото хэзээ зөөгөөбта?
- Новосибирск хото 2017 ондо зөөжэ ерээб, тэрэ сагhаа энэ эмхи удариданаб. Новосибирскын можын «Дом национальных культур имени Г.Д.Заволокина» гэһэн гүрэнэй соёлой автономито эмхиин үндэһэн соёлой политикаар түбтэ методистаар ороод, энэл түбэй методическа таһагые даагша хүрэтэрөө ургааб. Энэ эмхиие Новосибирскын можын бүхы үндэһэтэнэй хамтарал гэхэдэ болохо. Эндэ соёлой ба сүлөө саг үнгэргэлгын талаар ажал ябуулагдадаг, олон арадуудай хэмжээ ябуулганууд үнгэргэгдэдэг.
- Буряад үндэһэн соёлой автономи ямар хэмжээ ябуулгануудые эмхидхэдэг бэ?
- Пандемиин урда тээ ажал ехэ эдэбхитэйгээр ябуулагдаа. 2020 ондо Новосибирск хотын Арнольд Кацай нэрэмжэтэ гүрэнэй концертнэ танхим соо Сагаалганай найр наада үнгэргөөбди. Агын гүрэнэй дуу хатарай «Амар сайн» театр, Тыва Уласай арадай аман зохёолой хөөмэйшэдэй ансамбль, мүн буряад эстрадын, Новосибирск хотын ба Новосибирскын можын артистнарые уриһан байнабди. Эндэхи эрхим зохёохы бүлгэмүүдтэй харилсаа баридагбди.
Буряад Уласай арадай артист, Новосибирскын гүрэнэй консерваториин дуунай кафедрын доцент, Новосибирскын гүрэнэй оперо болон баледэй академическэ театрай солист Шагдар Доржиевич Зондуев «Байгал» буряад үндэһэн соёлой автономиин гэшүүн юм, бидэндэ ходо туһалжа байдаг. Тиихэдэ Новосибирскын консерваториин дуу дууладаг, хатардаг талаан бэлигтэй оюутадые болон түгэсхэгшэдые хэмжээ ябуулгануудтаа хабаадуулдагбди.
Пандемиин үедэ «Байгал» автономи нютаг можонууд хоорондын, бүхэроссиин, уласхоорондын онлайн-мүрысөөнүүдые эмхидхээбди. Жэшээлбэл, «Красная гвоздика» гэһэн патриотическа дуунай мүрысөөн болоо, тэрээндэ дүн хамта Россиин бүхы нютаг можонуудай, хари гүрэнэй 500 гаран хүн хабаадаа. Энэ ехэ hайн, юуб гэхэдэ манай автономиин Новосибирскын можоһоо холо гадуур мэдээжэ болоһые гэршэлнэ. Буряад Уласай, Эрхүүгэй можын, Үбэр Байгалай хизаарай түлөөлэгшэд олон онлайн-мүрысөөнэй янзануудта хабаадаа. Шог зугаагайшье мүрысөө эмхидхэжэ туршаабди. Буряад Уласай соёлой сайд Соёлма Цыдыповна Дагаева бидэниие ехэ магтаа һэн.
2020 оной Сурхарбаанда бидэ жэл урид бэлдэжэ эхилээ һэмди. Олон партнёрнуудтай болоод, эмхидхэхэ газар олоод, Буряад Уласай, Эрхүүгэй можын гэхэ мэтэ айлшадые уряад байтарнай, пандемиин үедэ ехэ хэмжээнэй мүрысөөнүүдые үнгэргэхэнь хоригдожо, энэ хэмжээ ябуулга хойшолуулагдаһан байна.
Новосибирск хотын хэмжээ ябуулгануудта эдэбхитэйгээр хабаададагбди. Энэ хадаа Илалтын үдэр, Арадай нэгэдэлгын үдэр, наһатай зондо зорюулагдаһан «Мои года – моё богатство» гэһэн декада ба бусад hайндэрнүүд юм. Бидэ наһатай зоноо дэмжэжэ, баясуулха, эдеэ хоолоор хүндэлхэ, концерт-наада табиха гэжэ оролдодогбди.
(Үргэлжэлэлынь 44-дэхи дугаарта уншахада болохо).
Цымжидма ДОЛГОРОВА.
