Намсарай Линхобоев 1928 оной январиин 1-дэ Могойтын аймагай Сагаан-Шулуутай нютагай Хонхор бууса гэһэн газарта түрэһэн.

   Υшөө һургуулидаш ороодүй Намсарай хүбүүхэн хүдөөгэй тугал буруу адуулһаар, байн үбһэндэ, хабарай тарилгада гаралсадаг, бригадын мори харадаг болоо.

   1938 ондо абань наһа баража, эжынь хүүгэдтэеэ Сагаан-Уулаһаа Сагаан-Шулуутай нютагаа бусаа. Тэрэ үедэ Намсарай Зугаалайн һургуулида һуража байгаа.

   Түрүүшын үбэл Кагановичой нэрэмжэтэ колхозой һүнэй фермэдэ һаалишанаар ажалладаг эжыдээ хамһалсажа үбэлжөө. Ерэхэ хабарынь полеводто ороод, газар хахалалсажа эхилээ. Дайнай жэлнүүдтэ Намсарай колхоздо адуу, тэмээ, үхэр хараа, таряанда, үбһэндэ, модоной ажалда, ашаа зөөлгэдэ ябаа.

   1945 оной намар Намсарай Линхобоев Нэршүүгэй зооветтехникумэй дэргэдэ ветеринарна фельдшернүүдэй курсда эльгээгдэжэ, тэрэнээ дүүргээд, нютагаа бусажа, Кагановичой нэрэмжэтэ ба «Коминтерн» колхозуудта хүдэлжэ эхилээ.

   1949 оной хабар сэрэгэй албанда татагдаа. Армиһаа табигдаад, Сагаан-Уулын ветеринарна участогые даагшаар хүдэлжэ эхилээ һэн. Һүүлээрнь Урта эльгээгдээ, түрүүшын жэлнүүдтэ элдэб тушаалнуудта хүдэлөө. Ямаршье ажал хэхэдээ, татагалзажа байдаггүй, анханай һурамхи зангаараа ажалаа хэдэг һэн. 1957 ондо түрүүлэгшын орлогшоор томилогдоод хүдэлжэ байтараа, 1960 ондо Шэтын советскэ партийна һургуулида һурахаар зууршалагдаа. 1963 ондо һуралсалаа түгэсхөөд, нютагаа бусахадаа, нилээд бэлэдхэлтэй, ном һударта шуналтай болоод ерээ һэн ха. Υнөөхил орлогшоороо хүдэлжэ эхилээд байтараа, сентябрь һарада ниитын суглаан дээрэ Намсарай Линхобоев олоной дуугаар «Улаан-Одон» колхозой түрүүлэгшээр һунгагдаһан байна.

   Тиигэжэ колхозой түрүүлэгшын 27 жэлэй туршада үргэлжэлһэн бэлэгүй зам эхилһэн түүхэтэй. Υнэхөөрөө, «Улаан-Одон» колхоз гушаад жэл соо эршэмтэй хүгжэжэ, амжалта туйлажа, түрүү зэргэдэ ябаа. Уртынхид шударгы бэрхээр ажаллажа һураа. Тэдэ жэлнүүдтэ Намсарай Линхобоевич Линхобоевой ударидалга доро габшагай бэрхээр хүдэлжэ, эрхим дүнгүүдые туйладаг байһан хүнүүдые нэрлэхэ болоо һаа, нилээд олон болохо.

   Урта һуурин болбосон түхэлтэй болоо, таряа, тэжээлэй баян ургасын нютаг гэжэ баталагдаа. Энээнһээ уламжалан, нютаг зоной байра байдал шэнжэ шанараараа эли тодо һайжараа.

   Ажахын мүнгэн зөөреэр соёлой байшан, дунда һургуули, участково больница, хүүгэдэй сэсэрлиг, банно-прачечна комплекс, конторо баригдаа, зунай водопровод татагдаа. Мүн гэр байрын барилга эршэмтэйгээр ябуулагдаа. Нютагай харгынууд заһабарилагдаа, хонишодой, малшадай буусануудта шэнэ гэр, хашаарнууд олоор бодхоогдоо.

   Тэрэ сагта Забайкалиин түрүү ажахынуудай нэгэн «Улаан-Одон» колхоз гүрэнэй шанда олон удаа хүртэһэн юм. КПСС-эй ЦК-гай, СССР-эй Министрнүүдэй Зүблэлэй, ВЦСПС-эй болон ВЛКСМ-эй ЦК-гай дамжуулгын болоод дурасхаалай Улаан тугуудые 3 удаа – 1978, 1980, 1988 онуудта абаһан байна. Харин 1979, 1983 онуудта СССР-эй дээдын засагай хүндэлэлэй грамотануудта хүртөө. Ажалай амжалтануудта хабаатай бэшэ урмашуулгын жэшээнүүдые дурдаха болоо һаа, тоогүй олон. Гүрэн түрэ Намсарай Линхобоевой аша габьяа анхаралгүй орхёогүй, Ленинэй, Ажалай Улаан тугай, Хүндэлэлэй орденуудаар, хэдэн медальнуудаар шагнаһан. Тэрэ РСФСР-эй хүдөө ажахын габьяата хүдэлмэрилэгшэ, Агын Буряадай автономито тойрогой хүндэтэ эрхэтэн бо-лоо.

   Намсарай Линхобоев хадаа хүн шэнжээрээ нэгэл ондоохон, бүри яагаадш һажаахын аргагүй абари зантай, һанал бодолтой, урданай хатуу, өөрынхеэ табидаггүй дотортой, зонтой хүдэлхэдөө тусгаар шадабаритай хүн байһан. Тэрэниие мэдэхэ зон «арадай түрүүлэгшэ» гээд нэрлэдэг һэн.

   Намсарай Линхобоевичой бэлэтэй бэлэгүй наһанай шатануудые дүнгэн даажа ябаһан Долгор Жамбалова нүхэрынь тэрэнэй «ара талые» тэсэмгэй найдамтайгаар хангажа һууһан, тэдэ долоон хүүгэдые хүмүүжүүлһэн. Хүн болохо, зоной  дунда орохо ябадалдань эсэгын һургаал, наһанай жэшээ ехэ нүлөө үзүүлһэн. Намсарай Линхобоевич 2021 оной июниин 6-да Урта нютагтаа наһа бараһан юм.

   Цымжидма ДОЛГОРОВА.

You have no rights to post comments