Василий Александрович 1933 ондо Шэтын можын Улаан Сүхын аймагай Укыр нютагта түрэһэн.

   Василий Севостьянов 1947 ондо нютагайнгаа долоон жэлэй һургуули түгэсхэһэнэй һүүлээр сельсоведэй секретаряар, клубые даагшаар хүдэлөө. Тэрэ багаһаа хойшо түрүүлэн ябагшын шанартай, шэнэ юумэн тээшэ шармайдаг, нэтэрүүгээр ном үзэдэг байгаа.

   Ерэхэ жэлынь Тарбагатайн профтехучилищида ороо, харин гэр бүлын шалтагаанаар һуралсалаа орхихо баатай болоо. Нютагаа бусаад, элдэб ажалда хүдэлөө. Энэ үедэ эдэбхи, үүсхэл гаргадаг эдир хүбүүн колхозой шалгалтын комиссиин гэшүүнээр ба түрүүлэгшээр һунгагдадаг байгаа. 1949 ондо КПСС-эй гэшүүн болоо.

   Сэрэгэй албанай һүүлээр Сретенскын аграрна техникумэй дэргэдэ бухгалтерай нэгэ жэлэй курс гараа, 1956-1959 онуудта тоонто нютагтаа бухгалтераар ажаллаа.

   1962 ондо Шэтын советскэ партийна һургуули дүүргээд, 1963 он болотор – КПСС-эй Улаан Сүхын айма-гай хорооной инструктораар, 1970 он болотор КПСС-эй партийна гүрэнэй хиналтын зургаанда (хожомынь арадай хиналтын зургаан болоһон) хүдэлһэн байна.

   Василий Севостьянов 1969 ондо Буряадай гүрэнэй хүдөө ажахын дээдэ һургуули түгэсхэжэ, «эрдэмтэн-агроном» гэһэн мэргэжэлтэй болоо.

   1970-1972 онуудта КПСС-эй Шэтын можын хорооной эмхидхэлэй-партийна таһагай инструктор ябаа.

   1972-1974 онуудта Москвада КПСС-эй ЦК-гай дэргэдэхи дээдэ партийна һургуули дүүргээд, КПСС-эй Шэтын обкомдо инструктор, Улаан Сүхын аймагай райисполкомой түрүүлэгшэ ябаа.

   1977 ондо Василий Севостьянов Могойтын РК КПСС-эй 1-дэхи секретаряар томилогдоо. Эндэл тэрэ талаан бэлигтэй хүтэлбэрилэгшэ байһанаа гэршэлээ. Севостьяновай ажалда орохын эхиндэ аймагай ажахынууд 49 мянган тонно орооһото культура абадаг һаа, шэнэ онол аргануудые нэбтэрүүлжэ, 1986 ондо 104 мянган тонно хуряаһан байна.

   Мал адууһанай талаар нилээд ехэ амжалта туйлаа, материально-техническэ бааза һайжаруулаа, малшадай мэргэжэл дээшэлүүлгэдэ анхарал хандуулаа, гараар хэгдэдэг хүдэлмэриие механическа хүсөөр хэгдэдэг болгоо, шэнэ үеын һүнэй комплекснуудые барюулаа, һү һаалга ба мяханай үйлэдбэри хүгжөөгөө.

   1986 ондо Василий Александрович хүдөө ажахыгаар облисполкомой түрүүлэгшын 1-дэхи орлогшоор томилогдоо. Тэндэ наһанай амаралтада гаратараа ажаллаа.

   1985 ондо Василий Севостьяновай 1-дэхи секретариин тушаалһаа болиходо, олон хүн тэрэниие табиха дурагүй байгаа. Тэрэ Укыр нютагта түрэһэн, Шэтэ хотодо ажаһуудагшье һаа, өөрыгөө Могойтынби гэжэ тоолодог юм. Олон хүндэлэлэй грамотануудай, баярай бэшэгүүдэй хажуугаар «Хүндэлэлэй тэмдэг» орденоор, «За заслуги перед Читинской областью», «За строительство Байкало-Амурской магистрали» гэһэн медальнуудаар шагнагдаһан. «Агын Буряадай автономито тойрогой хүндэтэ эрхэтэн» гэһэн нэрэ зэргэеэ сэдьхэлдээ тон үндэрөөр сэгнэдэг юм.

   Цымжидма ДОЛГОРОВА.

You have no rights to post comments