- Ирина Олеговна, хэды жэл буряад хэлэнэй багшаар хүдэлнэбта?

- Үбэр Байгалай хизаарай гүрэнэй багшанарай дээдэ һургуули түгэсхөөд, Могойтын гурбадахи дунда hургуулида 12-дохи жэлээ хүдэлжэ байнаб. 

- Ямар программаар хүүгэдтэ заанабта? Буряад хэлэ заалгада хэды саг үгтэнэб?

- Манай hургуули гүрэнэй хоёрдохи хэлэн гэһэн программаар ябадаг. 

5-11-дэхи ангинуудай hурагшадта заадагби, түрэл хэлэнэй ба уран зохёолой хэшээлдэ 1-1 саг үгтэдэг.

- Һургуулидатнай түрэл хэлэнэй мэдэсэ ямар хэмжээндэб? 

- Жэл бүхэндэ түрэл хэлэеэ ойлгодоггүй, буряадаар дуугардаггүй үхибүүд ерэнэ. Теэд яахаб, хамсыгаа шамаад лэ, ажалаа ябуулдагби. Табан жэлэй саана барагтай байгаа, «h» ба «х» абяануудые зүбөөр үгүүлдэг hурагшад дайралдадагшье һэн, теэд мүнөө байдал хүндэшэг. Тиигээшье hаа hурагшаднай бэрхэнүүд, оролдосотойнууд. 

«Абьяас ехэтэй багша» янзада илаа

Дулдаргын 2-дохи дунда һургуулиин буряад хэлэнэй ба литературын багша Сэсэг Тумурова уласхоорондын «Эрхим багша» мүрысөөнэй «Абьяас ехэтэй багша» янзада хүртэһэн байна.

- Сэсэг Даширабдановна, багшын ажалайтнай намтар хаанаһаа эхитэйб?
- Би 1996 ондо Алханын дунда hургуули дүүргээд, Буряадай гүрэнэй дээдэ һургуулиин буряад хэлэ бэшэгэй факультедтэ орооб. Наhанайнгаа мэргэжэлэй зам шэлэхэ хэрэгтэмни аба, эжымни заабари үгэжэ, ехэ нүлөө үзүүлһэн. 2002 ондо дээдэ hургуулияа дүүргэhэнэй һүүлээр түрэл hайхан нютагтаа эхин шатын ангинуудай, буряад хэлэнэй ба литературын багшаар 11 жэл ажаллаад, Дулдаргын 2-дохи дунда hургуулида 10 жэл хүдэлжэ байнаб.
- Һуралсалда ямар программа хэрэглэгдэнэб?
- Буряад хэлэнэй программа хадаа мүнɵɵнэй шэнэ ФГОС-ой эрилтэдэ таарама, «Буряад һургуулиин программанууд» дээрэ үндэһэлжэ (авторынь – Р.С.Дылыкова), Дулдаргын 2-дохи дунда һургуулиин һуралсалай түсэбɵɵр зохёогдоһон юм.

(Үргэлжэлэлынь 14-дэхи дугаарта).

Нордоп БАБУЕВА.

You have no rights to post comments