Майн 26-һаа Буянта һарын эхилхэдэ, ажаһуугшаднай заншалта ёһоор нангин шүтөөнэй газарнуудые бараалхажа, арбан сагаан буян үйлэдэнэ.
Эндэ һая Ага тосхондо, хүдөө нютагуудта ажаһуудаг бүлэг мүргэлшэд сугларжа, хамта дээрээ 50-60 гаран хүн Намнанай багшын субарга, Дүрөө шулуунуудай хүшөө,Сүүгэлэй дасан хүрэтэр ошожо мүргөө. Ниитэ эдэбхитэн, хизаар ороноо шэнжэлэгшэ Гончикбал Баиров наһанайнгаа амаралтада гараһан зоноор зүбшэн хэлсэжэ, Дашиниматай бимбын үдэр буян хэхэеэ аян замда гараһан байгаа. Буянаа арьбажуулхаяа ганса наһатайшуул бэшэ, харин дунда наһанай ба залуушуулшье ябалсаһан байна.
Һүзэгшэд Сүүгэлэй дасанда.
СҮҮГЭЛЭЙ ДАСАН
Ага тосхонһоо буян хэхэеэ зорижо ерэһэн зониие гид Бальжинима Цыренов угтан абажа, шажанай гуламтын түүхэ домогууд тушаа хөөрэжэ үгэһэн байха юм. Бальжинима Монломович залуудаа хонишон, адуушан, малай аргашан ябаһан. Тэрэ 1993 онһоо хори гаран жэлдэ Сүүгэлэй дасанда уран зурааша, реставратор ябаһан юм. Нагаса талань мүнгэшэ, алташа дархан зон байһан. Түрэлхиин угаа үргэлжэлүүлжэ, гарта дүйтэй байжа, модоор, түмэрөөр нарин дарха бүтээдэг байһан. Дасанай оройн, ганжарай угалзануудые хэжэ ябаһан. Хэһэн ажалынь угаа олон даа. Эгээл сэнтэй хүдэлмэринүүдэйнь нэгэн гэхэдэ, Сүүгэлэй дасанай Майдариин хуралда гаргагдадаг Сагаан зааниие бүтээһэн.
Дэлгэрэнгыгээр 23-дахи дугаарта.
