Буряад хэлэнэй һарын нээлгэдэ хабаадаһан зарим зонтой, дүршэлтэй багшанартай уулзажа, һанамжануудаарнь һонирхоо бэлэйбди.
Тэдэнэй нэгэн, Агын 1-дэхи дунда һургуулида эхин шатын ангинуудай багшаар 43 жэлэй туршада хүдэлжэ, наһанай амаралтада гараһан, Россиин Федерациин габьяата багша, «Арадай гэгээрэлэй эрхим» гэһэн тэмдэгтэй багшын ажалай ветеран Дулмацырен Кишигтуевна Бадмаева иигэжэ хөөрөө һэн: «Маанадай хүдэлжэ байхада, үхибүүднай буряад хэлэеэ ойлгохоо болижо, ород хэлэн тээшээ боложол ябаал даа. Дунда һургуулинуудта буряад хэлэнэй хэшээлдэ үсөөхэн сагай үгтэхэдэ, багша эдиршүүлдэ номыень үзүүлжэ үрдинэгүй, үндэһэн хэлэеэ муугаар мэдэдэг багашуул олошорно. Энээндэ үшөө нэгэ шалтагаан бии. «Саг сагаараа, сахилза хүхөөрөө» гэдэгтэл, үхибүүн мэдээ орохоһоо смартфон, планшет барижа, хамаг сагаа компьютерай саана үнгэргэжэ, тон түрүүн ород хэлэндэ һурана. Энээниие хорижо болохогүй. Зүгтөө гэртэхин электронно наадыень нормолхо ёһотой. 1990-ээд онуудһаа буряад хэлэндэ, ёһо заншалда, соёлдо анхарал хандуулагдажа эхилһэн. Тиимэ программануудые зохёожо, бишыхан номуудые гаргажашье туршаабди. Энэ талаар тойрог дотор яһала юумэн хэгдэнэ, түрэлхи хэлэ үзэлгэ хүгжөөхые оролдоно. Мүнөө Валентина Бальжинимаевна Черникова, Любовь Дарицыреновна Дондокова, Гэрэлтэ Батомункуевна Цырендашиева гэгшэдтэй суг хамта эхин шатын ангинуудай үхибүүдтэ классһаа гадуур уншаха ном зохёохо хүсэлтэйбди...
Дэлгэрэнгыгээр 41-дэхи дугаарта.
