Балдан Жигжитовэй «Сагаан хүбүүнэй хөөрөөнүүд» гэһэн ном шэнээр хэблэгдэхэнь.
"Ай, бурхан зайлуул!" хѳѳрѳѳнэй шэмэглэл зураг.
Хойто-Ага гол зубшаад, үргэн нугада нангин Пүнсэг уулын баруун урда талада Улаан Добо гэжэ газарта улаалзай хүбдүүд омогой Дорьёмын Жигжидэй гэртэ одхон табадахи үри Балдан хүбүүн түрэһэн байна.
Бага наһандаа үншэржэ, Жигжидэй Балдан түрэл гаралаараа, нютагаархинаараа байрлажа, хүдөөгэй ажалда дүршэһэн.
Эдирхэн наһанһаа агнуурида амаргүй ехэ һожортой болоһон. Лата үзэгүүдээр агнууриингаа ушарнууд тухай хөөрөөнүүдые баян буряад хэлэн дээрэ бэшэжэ эхилһэн түүхэтэй. Тэдэ хөөрөөнүүд соонь нютаг ороноо шэнжэлэлгэ хэгдэнэ, байдал зураглагдана. 1980 гаран онуудта «Агын Үнэн», «Толон» газетэнүүдтэ, «Байгал» сэтгүүлэй 2017 оной 5-дахи дугаарта зохёолнуудынь гараһан.
Шэрүүн утаһаар холбоотой зузаан боро хүхэ хуудаһанууд дээрэ хорон карандашаар бэшээтэй дүшэ гаран зохёол гэртэнь хадагалагдажа байһан. Харин мүнөө үе болотор зургааниинь лэ хүрэһэн байна. Балданов Баради Жигжитович хүбүүниинь эдэниие суглуулжа, нягта наринаар ородто оршуулжа, хоёр хэлэн дээрэ хөөрөөнэй нэгэ багахан суглуулбари хэблүүлжэ гаргаһан юм.
Мүнөө энэ суглуулбари зурагаар шэмэглэжэ, шэнээр гаргаха түсэб табигданхай. Шэнэ хэблэлдэнь Буряадай Уран зохёолшодой холбооной гэшүүн, хэлэ бэшэгэй эрдэмүүдэй кандидат В.Д.Жапов оролто үгэ бэшээ.
«Балдан Жигжитовэй зохёоhон рассказуудай hайн талань гэхэдэ, ажабайдалда ушардаг үйлэ хэрэгүүдые шэнжэлжэ, зохидоор, хүнэй ябадалда тааруулан харуулжа шадаа ха юм даа. Мүн лэ тиихэдэ тэрэ өөрынгөө дуратай ан болон агнуурида ушардаг үйлэнүүдые тодорхой hониноор, уран гоёор харуулжа туршаhан байна. Эдэ рассказуудынь өөрынгөө хүгжэлтөөр саашадаа бүри hонин удхатай эд болохол байгаа, теэд авторай хараа бодолой, зохёохы hэдэлгынь жэгүүрэй дүүрэhэниинь харамтай...» гээд Виктор Дармабазарович оролто үгэ соогоо бэшэнэ.
