- Пётр Валерьевич, та хаана түрэһэн гээшэбта?
   - Би 1968 оной сентябриин 8-да Хүһөөшэ нютагта мүндэлһэнби. Бага наһамни эндэл үнгэрөө. 1985 ондо нютагайнгаа дунда һургуули дүүргэжэ, дээдэ һургуули хэхээ ошонгүй, колхоздоо трактористаар хахад жэл хүдэлөөд, һүүлээрнь хонишон болооб. Тиигээд 1986 ондо 18 наһаяа хүсэжэ, октябриин 24-дэ сэрэгэй албанда татагдааб.
   - Сэрэгэй алба хаана хаажа эхилээ hэмта?
   - Ростовско можын Новочеркасск хотодо, Ермак атаманай түрэһэн нютаг гэжэ үшөө хэлэдэг, тэндэ зургаан һара бэлэдхэлэй һургуули гарааб. Рото бүхэнһөө 10 хүниие нэрлээд, тэрэл жэлэй апрельдэ гү, али май һарада гээшэ гү, самолёдоор Афганистанай хилэ гаража, Кабулай заха болохо «Тёплый стан» газар руу абаашаа гэжэ һананаб. Юундэб гэхэдэ, дайн байлдаануудта гарахадаа, ходо тэндэ, «Тёплый станда», тогтодог һэмди. Тэндэһээ намайе Баграм абаашаа. Совет сэрэгэй ехэ аэропорт байһан тэрэ газарта нэгэ батальон байгаабди, офицернүүдтэеэ хамта 420-ёод сэрэгшэд болодог һэмди.
   - Афганистанда алба хаажа ябаһан сагаа һанахада, сэдьхэлдэтнай юун хадуугдаһан байнаб?
   - Байгаалинь одоо гоё, теэд манай газар үшөө гоё (энеэнэ). Серпантинаар гаража байхада, ганса губи, ногоон үгы, тиигээд дээшээ ябаһаар байтар, хараа байса хүйтэн боложо, нуга эхилхэ, тиигэжэ байтараа, хуһан модод харагдаха, һүүлээрнь шэнэһэн ой, тиигээд дахин ногоон нуга гараха, саашаа хүйтэн болохо, харахадаш - саһан хэбтэхэ. Дээгүүр ябад гээд, доошоо буухада, үнөөхил ногоон нуга, ой - иимэ байгаалиһаа дорюун болохоор байгша hэн. Губи соогуур Кандагар хото ошохо замдамнай амиды гахайн шэнээн томо гүрбэл зогсожо байха..
   - Гэр бүлэ тухайгаа хөөрэжэ үгыт даа.
   - Эжымни Цыпылма Хижняк 1940 оной. Нүхэрни - Ринчин-Ханда Линхобоевна, гурбан хүбүүтэйб. Ехэмнай - Алексей Шэтэ хотодо байдаг, таксигай жолоошоноор хүдэлнэ, Сергей гэжэ хүбүүтэй. Хоёрдохи Валера хүбүүмнай Эрхүүгэй можын Боохон нютагта түүхын багшаар хүдэлнэ, Тамир, Адалина ба Эвелина гурбан хүүгэдтэй. Одхон хүбүүмнай - Максим. Ашанарнай мэнэ-мэнэ айлшалдаг, Шэнэ жэлээр, Сагаалганай найрта булта маанадаа эрьеэд ошодог юм.
   - Ямар шагналнуудта хүртэhэмта?
   - Түрүүшын шагнал гэхэдэ, «70 лет Вооружённым Силам СССР» медаль абааб, һүүлдэнь «Воину-интернационалисту от благодарного афганского народа», «За боевые заслуги» медальнуудта хүртөөб. Саашадаа ойн баярнуудай медальнууд олон байха.
   - Мүнөө ямар түсэбтэйбта?
   - Нютагтаа үхэр малаа үдхэжэ, талха таряа тарижа, хүдөө ажаһууха гэжэ бодоноб. 50 наһа хүсэжэ, хэр үрдихэ юмбиб, тэрээнһээ гадна хүдөө газар абахадаа, Онон голой саана үгэхэ болоно...
   - Үшөө нэмэхээр һанал бодолтой гүт?
   - Афганистанай газараар ябажа, хүшэр хүндэ сагуудые туршажа үзэһэндөө би ехэ һанаагаа зобоногүйб. Сэрэгэй үнэн нүхэд хэд гээшэб гэжэ тэндэл мэдэхэ болооб - тэрэмни эгээл сэнтэй. Тэрээгүүр ябаагүй һаа, нүхэдэй һайниие, найдамтайе, магад, мэдэнгүй үлэжэ болохо hэм.

You have no rights to post comments