Энээхэн дуу хальбан омогойхидой амаршалгын дуун болгожо, «Уг изагуураа удхалан түүрээе!» гэһэн фестивалиин үедэ 85-дахяа сагаалһан гутаар хальбан Доржиева Галина Доржиевна гүйсэдхөө бэлэй. Үндэр наһатай эгэшын хүнгэн ябадал, зохидхоноор аянгалһан хонгёохон дууниинь олон тоото харагшадта хадуугдаа ёһотой. «Аба эжыгээ үргэе!» гэһэн энэ дуунайнь үгэ ахань зохёоһон байгаа, харин хүгжэмыень арадай дуунай аялгаар өөрөө тааруулһан байна. Һүүлээрньшье хальбан омогойхидой һэеы гэр соо Галина Доржиевнагай гүйсэдхэһэн арадай дуунуудые хэншье шагнаха аргатай байгаа. Тиимэл эсэшэ сусашагүй, зугаатай хүхюутэй эгэшэ. Суг ябаһан угайхидайнь тэмдэглэһээр, Галина Доржиевна дүрбэн тэгшэ бэлигтэй, оёхо нэхэхэдээ угаа бэрхэ.
   Дууша, зугаатай эгэшэ Дулдаргын аймагай Үзөөн нютагта 1936 оной августын 20-до алтан дэлхэйн шарай хараһан намтартай. Наһанайнгаа 33 жэлыень Агын тойрогой больницын «Функциональная диагностика» таһагта медсестрагаар ажаллаа. «Түмэн жаргалан» ансамблиин байгуулагдаһан сагһаа, 1989 онһоо энэ бүлгэмэй эдэбхитэй гэшүүн болоһон юм.
   Гурбан үринэрэйнгөө гарыень ганзагада, хүлыень дүрөөдэ хүргэнхэй: ехэ хүбүүниинь - архитектор, хоёрдохи басаган үринь - хүгжэмэй багша, одхон хүбүүниинь - артист.
Буянта наһа эдлэжэ, ажана тэнюун ажаһуужа байһан эгэшэ бүгэдэ уншагшадтамнай хандан,
   «Аба эжын буянгаар,
   Алтан дэлхэйн үргэмжөөр
   Бурханай үгэһэн наһа эдлэжэ,
   Буянтай хэшэгтэй, элүүр энхэ һуухатнай болтогой!» – гэжэ үреэнэ.

You have no rights to post comments