Агын хизаарай Ц.Жамцараногой нэрэмжэтэ номой сан соо үнгэргэгдэhэн номой мүрысөөндэ хамта 77 ном ба тэдэнэй 67 авторнууд хабаадаhан ушартай.
Шэнэ буряад номуудые сэгнэhэн уласхоорондын жюрин бүридэлдэ Ц.Жамцараногой нэрэмжэтэ хизаарай номой сангай захирал Дарижапова Д.Б., түүхын эрдэмэй кандидат, Буряадай гүрэнэй университедэй сурбалжалагшадай танхимай доцент Шагдарова Б.Б., хэлэ бэшэгэй эрдэмэй кандидат, Буряадай гүрэнэй университедэй доцент, «Байгалай олон шэглэлэй колледж» гэжэ гүрэнэй hуралсалай эмхиин багша Ошорова С.А., Эрхүүгэй можын Усть-Ордагай Буряадай тойрогой Захиргаанай үндэhэтэнэй хэлэнүүдэй талаар таhагай дарга Харбанова В.В., Монголой эрдэм hуралсалай габьяата хүдэлмэрилэгшэ Вандуй Ичинхорлоо, Монголой телевидениин габьяата хүдэлмэрилэгшэ, «ТВ-9» каналай түлөөлэгшэ Базаржавын Шагдаржав гэгшэд ороhон байна.
Конкурсын янза бүхэндэ гурба гурбан илагшад тодорбо:
«Yхибүүдэй уран зохёол» гэhэн шангай лауреадууд:
- Батоева Цыремжит ба Цыренова Лхама, Yбэр-Байгалай хизаар, «Ухаан бодолой угалза» гэжэ ном;
- Хомонова Саяна, Буряад Улас, «Хүдөөгэй зун»;
- Бадмаева Дулмацырен, Дондокова Любовь, Цырендашиева Гэрэлтэ, Черникова Валентина, Yбэр-Байгалай хизаар, «Һолонго: классhаа гадуур уншаха ном: 2-дохи класс; 3-дахи класс; 4-дэхи класс».
«Уран зохёол» шангай лауреадууд:
- Лыгденов Александр, Буряад Улас, түүхэтэ туужа «Нуудэлшэд»;
- Эрдынеев Аюша (Тенчой), Yбэр-Байгалай хизаар , «Хори буряадай түүхэнүүд»;
- Загдаева Бадмаханда, Yбэр-Байгалай хизаар, «Нютагай татаса».
«Уран шүлэг» шангай лауреадууд:
- Батоболотова Дугарма, Yбэр-Байгалай хизаар, «Ажабайдалай агшан зуура»;
- Галсанов Базаржаб, Буряад Улас, «Буряад оронойм бүргэдүүд»;
- Рэнчэндоржийн Онон, Бадамдоржийн Одцэцэг, Цындийн Бадамдорж, Монгол орон, «Улзамни».
«Баримтата ном» шангай лауреадууд:
- Гармажапов Батожаргал, Yбэр-Байгалай хизаар, «Бүхэшэгүй зулын гэрэл»;
- Ардаева Лариса, Буряад Улас, «Тайбан байдал заяагаад…»;
- Цыбенова Цындыма, Yбэр-Байгалай хизаар, «Шатар наадан – хэшэг буян заяаhан».
«Буряадууд ба буряадай соёл тухай бусад хэлэнүүд дээрэ» шангай лауреадууд:
- Дабаин Баясхалан, Буряад Улас, «Герои со звездами и без звезд»;
- Хантуев Анатолий, Эрхүүгэй можо, «Родословные Кудинских бурят по архивным материалам Кудинского бурятского ведомства XVIII-XX вв.»;
- Афиногенова Оксана, Эрхүүгэй можо, «Родословные легенды и предания моего рода».
«Алтарганын» номой урилдаанда олон гүнзэгы удха шанартай, hонирхолтой номууд хабаадаhан байна. Тэдэнэй дунда Агын хизаар ороноо шэнжэлэлгын музейн хүдэлмэрилэгшэдэй хамтын хүсөөр бүтээhэн, Шойжит Арсаланова редактортай «Угайм алтан hабагша» гэжэ ном олоной анхарал татаа. Музейн эрдэмэй ахамад мэргэжэлтэн Баир Дугаржаповай тэмдэглэhээр, хори буряадай 11 угай эрхим түлөөлэгшэд тухай тус ном олон тоото уулзалгануудай ба туйлай ехэ шэнжэлэлгын хүдэлмэринүүдэй ашаар найруулагдан хэблэгдэhэн.
Мүн лэ Амгалан Жамсоев, Лариса Бадмаева, Галина Очирова эрдэмтэдэй бэшэhэн «Хори буряадуудай Асагадай очерк» тусхай hуури эзэлнэ. Хори буряадуудай худай угай гулваа Жэгжэд Галсановай бэшэhэн гэжэ угай бэшэгүүдые эрдэмтэд хуушан монголhоо мүнөөнэй буряад хэлэндэ оруулжа, ород ба англи хэлэнүүд дээрэ оршуулhан байна. Тиимэhээ урдын хори буряадай түүхые ондоо гүрэнүүдтэ ба континентнүүдтэ ажаhуудаг бусад үндэhэн яhатан уншаха аргатай.
Баярма БАТОРОВА.
Фото: agalibr.ru
