- Амгалан, Тайваниин университедтэ ороһоноо хөөрэжэ үгыш даа.
   - Минии аба нютагаараа Урда-Агын, эжымни Хёлгын аймагай Үхэриг һууринда түрэһэн. Агын 1-дэхи дунда һургуулиин эхин шатын ангида һуража байхадамни, гэр бүлэмни Улаан-Үдэ хото зөөгөө. Тиигэжэ Улаан-Үдын 49-дэхи дунда һургуулида һуража түгэсхөөд, Санкт-Петербургын хадын университедтэ ороод байһанаа болёоб. Энэ үеэр Тайваньда һургуули хэхэеэ һанаһан залуушуулда саарһа данса бэлдэжэ тушааха хэрэгтэ туһалдаг айлтай Инстаграм соо танилсаабди. Эжымни энээгээр ехэ һонирхоо, мүн тиихэдэ англи хэлэндээ hайн байгааб. Тэрэ айл ямар университет шэлэхэб, һуралсалай ямар программанууд байдаг бэ, дээдэ һургуули дүүргэһэнэй hүүлээр ямар ерээдүйтэй байхаб гэжэ хөөрөөд үгөө. Һүүлэй hүүлдэ туршая гэжэ бодообди. Санкт-Петербургын хадын университедһээ болёод, Буряадай гүрэнэй университедтэ һуража байхадаа, Тайваниин университедтэ орохоёо дансануудаа бэлдэжэ эхилээб. Англи хэлэ мэдэсээр «IELTS» гэһэн уласхоорондын шалгалта гараха хэрэгтэй байхадань, хоёр-гурбан hарын туршада бэлдэжэ, декабрь соо Москва хото ошожо, тэрэнээ hайн тушаагааб, тиин англи хэлэ мэдэсээр үнэмшэлгэтэй болоо һэм. Һүүлээрнь 49-дэхи дунда һургуулиингаа багшанар болон захиралһаа характеристикэ суглуулааб. Тиигээд дансануудаа Тайваниин университедүүдтэ эльгээжэ эхилээбди. Дүн хамта 6 университедтэ мэдүүлгэ оруулаабди, 5-иинь намайе оюутан болгожо абаха бэлэн байгаа. Би Тайваниин үндэһэтэнэй эрдэмэй ба технологиин университет шэлээб. Мүн тиихэдэ «Taiwan Scholarship» гэһэн Засагай газарай стипендидэ мэдүүлгэ оруулаа һэмди. Энэ хадаа Тайваниин Һуралсалай яаманай программа болоно, гол зорилгонуудынь гэхэдэ, дэлхэй дээрэ Тайваниин һуралсал нэбтэрүүлгэ, хари гүрэнэй оюутадые дэмжэлгэ, олон гүрэнүүдтэй холбоо харилсаа үргэдхэлгэ ба бэхижүүлгэ юм. Майн эсэстэ намда Тайваниин Һуралсалай яаманһаа правительственна программа шүүгээт гэһэн мэдээсэл ерээ. Энэ программаар һуралсал түлбэригүй байдаг, мүн hара бүри стипенди үгтэдэг. Энээндэ ехээр баярлааб.
   - Тэндэ һурахада ямар бэ?
   - Бүхы хэшээлнүүд – англи хэлэн дээрэ, хитад хэлэ ерэхэ семестрһээ үзэхэб. Нэгэдэхи курсда һургуулиин юрэнхы программа үзэнэбди. Дунда һургуулида тоо бодолго физикэ хоёрые һайнаар үзэһэн намда бараг байна, хими нэгэ бага хатуу, тиимэһээ ходо ном уншажа, һуралсалай видео харанаб. Хоёрдохи курсда һуралсалайнгаа гол шэглэл шэлэдэг, тэрээгээрээ саашаа һурадаг. Магистратурада хамта 4 жэл һурадаг. Оюутан университедээ урид, hүүлдэшье дүүргэхэ аргатай байдаг. Шалгалтануудаа һайн тушаабал, оюутад урид университедээ дүүргэдэг. Абгаймни эндэ һурахадаа, һургуулияа хахад жэлээр урид түгэсхөө һэн.
   - Ямар шэглэлээр һуралсалаа үргэлжэлүүлхэеэ һананабши?
   - Би инженер-барилгашан гү, али микро-схемэнүүдэй ба полупроводнигуудай үйлэдбэридэ хүдэлдэг инженер болохо түсэбтэйб. Эдэ мэргэжэлнүүдтэ һурахын тула «Material science and engineering» гэһэн шэглэлдэ орохо хэрэгтэй. Тэндэ «Material science» гэһэн гол предмет үзэгдэхэ.
   - Тус университедтэ буряадууд үшөө һурадаг гү?
   - Буряад хүниие хараагүйб, монголнууд бии.
   - Тайбэйдэ олон танилтай гүш?
   - Энэ хотодо абгаймни байдаг. Тайваниин ондоо хотонуудта танилнууд, түрэлхидни ажаһуудаг.
   - Шинии бүлэгтэ хаанаһаа ерэһэн оюутад һуранаб?
   - Индонези, Таиланд, Палау, Гондурас, Парагвай, Германи, Урда Америкын гүрэнүүдэй оюутад һурадаг. Тэдэ булта хөөрүү, хүхюутэй, нүхэрлиг зон юм. Манай университедтэ Москвагай хүбүүн һурадаг, байрада сугтаа байдагбди.
   - Тайбэй гоё хото гү?
   - Гоё, томо, үндэр байшануудтай, олон ажаһуугшадтай мүнөө үеын хото юм. Оршон тойроод ганса азиат шарайтай зоной байхада, ехэ һонин байгаа. Жэшээнь, Улаан-Үдэдэ ородуудшье бии гээшэ бэд даа. Тайвань ошоходоо, Улаан-Баатарhаа Сеул ниидээд, тэндэһээ Тайбэй хүрөөб, сэхэ маршрудгүй юм.
   - Һуралсалай шэнэ жэл хэдынһээ хэды болотор үргэлжэлдэг бэ?
   - Сентябриин 5-hаа эхилээд, декабриин hүүл болотор һурадагбди. Тиигээд бүхэли январь һара амараад, февральhаа июниин эсэс хүрэтэр һурадаг гуримтай.
   - Yбэлэй амаралтада гэртээ ерэхэ гүш?
   - Ошохогүйб, юундэб гэхэдэ самолёдой биледүүд үнэтэй юм.
   - Университедэй дэргэдэ ямар кружогууд, секцинүүд ябуулагдадаг бэ?
   - Футбол, баскетбол, тамаралга, бадминтон, бильярд, гольф, теннис, дайвинг гэхэ мэтэ тамирай олон секцинүүд бии, хатарай кружок ябуулагдадаг.
   - Тэндэхи уларил, байгаалинь ямар бэ?
   - Модотой, ногоотой, дулаан, бороотойшог, гоё һайхан байгаалитай газар юм. Манай университедэй кампус соо хөөрхэн шубууд ниидэжэ байдаг.
   - Ерээдүйн оюутадта, һурагшадта ямар зүбшэл заабаринуудые үгэхэ байнабши?
   - Иишээ ороходо хүндэ хүшэр юумэн үгы, һанаагаа ехэ зобохо хэрэггүй, айнгүй, оролдоод лэ ябахаар. Һургуулидаа муугаар һуража байбал, үсэдөөр номоо үзэжэ эхилхэ хэрэгтэй. Жэшээнь, эндэ зарим багшанар нэгэ хэшээл соо 2-3 бүлэг (глава, тема) гарадаг. Номоо ехээр лэ үзэхэ хэрэгтэй даа.
   - Һайнши даа. Һуралсалдаш амжалта хүсэнэбди.

   Цымжидма ДОЛГОРОВА.

You have no rights to post comments