Холо, ойрыншье шабинартай
Июль һарада һур харбалгаар Россиин мүрысөөнэй үргэн дэлисэтэйгээр эмхидхэгдэһые мэдэнэбди. Мүрысөөнэй үедэ майханууд соо Агын тойрогой урдаа хараха уран гартанай ажалнууд дэлгээгдэнхэй байгаа. Хажуугаарнь хаа-хаанагүй мастер-классууд эмхидхэгдэжэ, олоной анхарал татаа бэлэй.
Нэгэ майхан соонь Янжима Цывановна шабинартаяа каллиграфиин үзэсхэлэн дэлгээнхэй, дуратайшуулда мастер-класс харуулжа байгаа. «Энэ үзэсхэлэндэ минии болон хэдэн шабинарайм ажалнууд дэлгээгдээ», - гэһэн үгэнүүдээр багша (би Янжима Цывановнагай шаби болоноб) хөөрөөгөө эхилээ һэн. Шабинар тухайгаа хөөрэжэ үгыт гэжэ хандахадам, багша иигэжэ харюусаа: «2018 он байгаа. Агын тойрогой гимнази-интернадай хүүгэдтэ хуушан монгол хэлэ заажа туршааб. Тэрэ үеэр Агада ажаһуудаг, хуушан монгол ба түбэд хэлэнүүд дээрэ гоёор бэшэдэг, бурханай дүрэ зурадаг Цырена Болотова намда һурахаяа ерээ бэлэй. Мүнөө Цыренын ажалнууд хаа-хаанагүй үзэсхэлэнүүдтэ дэлгээгдэдэг болонхой. Хажуугаарнь мастер-класс харуулдаг. Уран гоёор бэшэлгэдэ дүй дүршэлтэй болоһон.
Агын хүүгэдэй уран урлалай байшанда ажалда ороод, каллиграфиин курс тухай соносхоо һэм. Тэндэ Агын дасанай Цыден лама һайнаар бэшэдэг болоо. Россиин Уран зураашадай холбооной гэшүүн, нютаг орондоо мэдээжэ Намжилма Эрдынеева хэшээлнүүдтэ ябажа, үзэг бэшэгтэ һураа. 2021 ондо үшөө нэгэ курс эмхидхээб. Тэндэ үмсын хэрэг эрхилэгшэ Вероника Бадмажабэ, «RIIMO» гэһэн дизайн-студитай, арһан сүүмхэнүүдые оёдог Римма Дылгырова, Агын тойрогой больницада психологоор хүдэлдэг Саяна Найданова, Агын тойрогой больницын офтальмолог Наталья Цыремпилова, Могойтын фотограф, гарай бэлэгүүдые бүтээдэг Жаргалма Ширабжалсанова, һүнэй архи нэрэхэ дүршэлөөрөө хубаалдадаг Дулма Болотова, һэеыгээр гарай бүтээлнүүдые бүтээдэг, заншалта хубсаһа оёдог Димит Батоболотова – хамта 7 хүн һураа бэлэй. Энээхэн бүлэг басагадни шадалтай, хэн хэнииньшье өөр өөрын һаналтай, хараа бодолтой, һанаһандаа хүрэхэ, эрмэлзэл ехэтэй байгаа. Мүн Америкэдэ ажаһуудаг психолог Олеся Мищенкова намда ябажа һураа.
Эгээл һүүлдэ таанадай курс байгаа. Баһал талаан бэлигтэй, урагшаа һанаатай басагад олон һэн. Тэдэнэй дунда Яхад Уласһаа гарбалтай, өөрын мастерскойтой, хүүгэдтэ зурагай хэшээл ябуулдаг, заншалта буряад хубсаһанай захил абажа, эскиз хэдэг Елена Тудупова ябаа. Оршон тойронхиие һайн талаһаань хаража, тэрэнээ уран гоёор зуража харуулха хүсэлтэй, гартаа дүйтэй, уран бэрхэ, ном үзэхэ дуратай, нютаг оронойнгоо түүхэ ба уг гарбалаар һонирходог басагад ерэжэ һурадаг.
Энэ жэл онлайн аргаар ород яһатанай Наталья гэжэ нэрэтэй хоёр басагадта хэшээл ябуулааб. Нэгэниинь Тайландда ажаһуудаг, архитектор мэргэжэлтэй. Нүгөөдэнь – Москвагай экономикын дээдэ һургуулида европейскэ каллиграфи заадаг багша, дизайнер, хэдэн хари хэлэнүүдые үзэһэн, хажуугаарнь араб хэлэ шудалһан хүн. Эдэ хоёрой хуушан монголоор уран гоёор бэшэлгэдэ һураха гэжэ зорюута зориходонь, хэрэгээрээ Улаан-Үдэ ошоһон байжа, тэндэ заагааб».
(Үргэлжэлэлынь 30-дахи дугаарта уншахада болохо).
Валентина ЦЫРЕНЖАПОВА.
