- Зорикто Ринчинсамбуевич, өөр тухайгаа хөөрэжэ үгыт.
   - Би 1977 ондо Табтаанай hууринда түрэhэнби. 1994 ондо Табтаанайн дунда hургуули дүүргээд, нэгэ жэл нютагтаа хамтын ажахыда хонишоной туhалагшаар хүдэлөөб. 1995 ондо Буряадай гүрэнэй хүдөө ажахын академидэ ороод, 2000 ондо түгэсхөөб. Тиигээд Табтаанайн ветеринарна участогай фельдшерээр хүдэлжэ эхилээ һэнби. 2004 оной хабар Дулдарга зөөжэ, Дулдаргын аймагай ветеринарна станцида терапевтээр орооб, намарынь малай ахамад аргашанаар томилогдооб. 2007 ондо Дулдаргын ветеринарна лабораториин захирал болоод, 2012 онhоо малай аргашан-эпизоотологоор хүдэлөөб. 2016 онhоо Дулдаргын тойрогой малай үбшэ-нүүдтэй тэмсэлгын станциин даргаар ажалланаб. Нүхэрни Баярма Батомункуевна Лхасаранова Дулдаргын тойрогой Жамсо Тумуновай нэрэмжэтэ номой санда ажалладаг, дүрбэн хүүгэдтэйбди.
   - Юундэ энэ мэргэжэл шэлээбта?
   - Ринчин-Самбу абамнай Табтаанайда 40 гаран жэл малай аргашанаар ажаллаhан. Би багаhаа хойшо абаяа дахажа, малшадта хүдөө ябадаг hэм. Эхин ангиин багшамни «Би малай аргашан болохоб» гэжэ бэшээ hэнши гэжэ хөөрэдэг.
   - Малай аргашанай ажал ямар гэжэ hананабта?
   - Хэрэгтэйшье, хүндэшье ажал, үдэр hүнигүй ажалдаа ябаха хэрэгтэй, сүлөө саг гэжэ байхагүй, хүйтэн дулаан гэжэ байхагүй – үбэлэй хүйтэндэ, халуун наранда ажал гаражал байха. Малай халдабарита үбшэн бү тараг гэжэ бүхыгөөрөө оролдодогбди. Малай удаажа hуулижа абахадаа, нюсэгэн гараараа орохош, досоонь – халуун, газаа – хүйтэн, тиихэдээ гар үбдэдэг болоно. Малай аргашад патриодууд гэжэ hанадагби.
   - Мүнөө хэды хүн хүдэлнэбта?
   - Тойрогто 10 хүдөө hууринай Дулдаргын малай үбшэнүүдтэй тэмсэлгын участогууд хүдэлдэг. 58 хүн байха аад, 51 хүн ажалланабди: дээдэ hургуулитай – 16 хүн, дунда мэргэжэлтэй – 15, санитарнууд – 10, диагностикын кабинедтэ шуhа шалгадаг 2 эмшэд ба лаборант, хоёр бухгалтернууд, хоёр жолоошод ба гурбан кочегарнууд бии. Ехэнхидээ наhанай амаралтада гараhан олон хүн хүдэлнэ. Хэдэн хүн дүршэл гарахаяа ерэнхэй, хүдэлхэеэ үлэхэ юм гү – мэдэхээр бэшэ, оюутад булта хотодо ветеринарна клиникэнүүдтэ ажаллахаяа үлэнэ. Гэртээ байhан хүнүүдтэй хөөрэлдөөд, санитараар ажалда абаад, Могойтын аграрно-промышленна техникумдэ ба Шэтэдэ Yбэр Байгалай хизаарай аграрна дээдэ hургуулида заочноор түлөөһэгүйгөөр hургадагбди. Арба гаран хүниие hургаад байнабди, мүнөө гурбан хүн hурана, hуралсалай бүхы эрхэ нүхэсэл бии. Тиигэжэ ажалшадтай болонобди, бэшээр болоногүй. Мүнөө жэл 3 хүн наhанай амаралтада гараа, ажалтад дутана. Ехэнхидээ малшадай хүүгэд ажаллана, мал ажаллаха дүршэлтэй байна.

You have no rights to post comments