Һур харбаан гээшэ анхан сагһаа угсаата арадаймнай эгээл хүндэтэй үндэhэн наадан байhан юм.
   Зунай халуун хаһа буужа, хүйхэрэй мэргэшүүлэй буряад hурша номоор хүдөө талада мүрысэхэ саг ерээ. Эндэ һая Шулуутай нютагай стадионой ногоон талмайда Үбэр Байгалай хизаарай мэргэшүүл буряад эбэр номоор харбажа мүрысөө. Мүрысөөн Россиин арадуудай нэгэдэлэй жэлдэ зорюулагдаһан байна. Агын, Дулдаргын, Могойтын тойрогуудай хоёр-хоёр болон Шэтэ хотын, Забайкальск, Ага тосхонуудай ба Шулуутайн – хамта 10 можо түлөөлһэн тамиршад мэргэнээ элирүүлээ. Хёрхо мэргэнээрээ шалгарһан һуршадай ластии тудахадань, баршадай «Ба-ра-а, ба-ра даа зай хүйхэрэй мэргэн…!» гэжэ барлахые шагнажа байхада, ямар гоёб даа. Можодо харбаһан тамиршад 35, 45 метр зайһаа найман һур табяа. Мэргэшүүлэй эбэр номоороо зураахай руу харбахадань, һур бүлэн, ластии оножо буунад. Заримашуулай һурша харьянашье, дабанашье. Һүүлэй һүүлдэ хёрхо мэргэшүүлэй нэрэнүүд элирээ. Дулдаргын тойрогой можо эгээл мэргэнээрээ шалгаржа, түрүү һуурида гараа. Могойтын тойрогой, Забайкальск тосхоной һуршад хоёрдохи ба гурбадахи һууринуудые эзэлһэн байба. Мүрысөө эмхидхэгшэдэй тэмдэглэһээр, можын харбаан Шулуутай нютагта дэмыдэ үнгэргэгдөөгүй. Энэ нютагһаа мэдээжэ хүйхэрэй мэргэшүүл олон гараһан юм. Агын Буряадай тойрогой Захиргаан, Жамьян-Базар Жанабазаровай, Батомунко Жигжитовэй, Цыбен Рыкцыловэй гэр бүлэнэр, Шулуутай нютагай ажаһуугшад мүрысөө үндэр хэмжээндэ эмхидхэлгэдэ мүнгөөр туһалаа, дэмжээ. Улаан-Үдэ хотодо һаядаа үнгэргэгдэхэ «Алтаргана» нааданай урда тээ эрхим һуршадые шэлэлгын мүрысөөн болоо гээшэ.

You have no rights to post comments