- Будаханда Сультимовна, Хүнхэрэй хүүгэдэй сэсэрлигтэ монолингвальна бүлэг хэзээ хүдэлжэ эхилээб? Ажалтнай хэр ябажа байнаб?
   - 2023 оной сентябриин 1-һээ Агын Буряадай тойрогой хүүгэдэй 8 сэсэрлиг, тэдэнэй тоодо манай дунда бүлэг монолингвальна шэглэлээр хүдэлхэеэ пилотно талмайда ороһомди. Эржена Цымпиловна Суходаева, нэмэлтэ һуралсалай багша Туяна Баторовна Дамбаева гэгшэд буряад хэлэнэймнай багшанар юм.
   Буряад Уласай һуралсалай политикаар институдай һургуулида ороодүй хүүгэдэй ба эхин шатын һуралсалай кафедрые даагша, профессор Сономбал Цыденович Содномов бидэндэ туһалдаг, заадаг юм. Тэрэ мүнөө жэлэй январиин 1-һээ штадтамнай ороһон. Улаан-Үдын хүүгэдэй сэсэрлигүүдтэй хүдэлдэг хадаа буряад хэлэн дээрэ «Математикын орон», «Хонгёохон аялган» гэһэн программануудые зохёоһон. Тэдэнииень бидэ хэрэглэнэбди.
   Программанууд бии, хэгдэжэшье байна. Хүсэд программа-нуудтай болоходоо, багшанарташье хүдэлхэдэнь аша үрэтэй байха. Дунда бүлэгэй программанууд бии, бага бүлэгэй программанууд бэлдэгдэжэ байна.
   Маанадта, тойрогой 8 сэсэрлигтэ даабари үгөө. Бидэ бага бүлэгэй хүүгэдтэ «Буряад хэлэн» гэжэ программа бэшэнэбди. «Минии бүлэ» гэжэ сэдэбээр 12 хэшээл бэлдэхэбди. Таабари, жороо үгэнүүд г.м. сэдэбүүдтэ тааруулжа, бэдэржэ, дидактическа наадануудые зохёохо болонобди. Ехэ ажал хэгдэжэ байна.
   - Гэртэхин хүүгэдэйнгээ буряад хэлэ шудалуулха шэглэлтэй бүлэгтэ һураха болоходо, дуратай байгаа гү? Хэды хү-дэлмэрилэгшэдтэйбта?
   - Энэ түлэблэл бэелүүлхын түлөө түрүүн гэртэхинһээнь зүбшөөл абаа һэмди. Гэртэхин дуратай байгаа.
Хүүгэдэй сэсэрлигтэмнай 15 хүдэлмэрилэгшэд ажалладаг, 37 хүмүүжэмэлнүүд ябадаг. Мүнөө жэл 13 хүүгэд һургуулида орохо.
   - Түрүүшын амжалтанууд ямар бэ? Хэды болоод ажалаараа тоосодогбта?
   - Хүүгэднай хүдөөгэйшье һаа, мүнөө булта ород хэлэтэй болоһон. Тиимэһээ монолингвальна бүлэгэй үхибүүд жэгтэй ехэ амжалта туйлажархёод байна гэхын аргагүй, тиигээшье һаа яһала энэ тэрэ үгэнүүдые хэлэдэг болоо, бага багааршье һаа ойлгодог боложо байна.
Февралиин 6-7-до Агын «Ручеёк» хүүгэдэй сэсэрлигтэ 8 хүүгэдэй сэсэрлигэйхид сугларжа, хахад жэлэйнгээ ажалаар тоосоо һэн. Хэшээлнүүдые харуулаа. Май һарада Агын аймагайхид ажалаараа тоосохобди. Жэлэй эхиндэ, эсэстэ, мүн хоорондын мониторинг хэнэбди.

You have no rights to post comments