Шүүгшэд мүрысөөндэ шүлэг гээшые хэр уран гоёор, зүбөөр уншанаб, шүлэг уншажа байхадаа, тайзан дээрэ хэр шадамар бэрхээр бэеэ харуулнаб гэжэ сэгнэхын хажуугаар бэе бэеэ дабтана гү, ямар поэдүүдэй ямар сэдэбтэй шүлэгүүдые шэлээб, хүүгэдэй наһанда тааруу гээшэ гү гэхэһээ эхилээд, бүгэдые анхаржа шагнадаг гээшэ ааб даа. «Үбэр Байгалай хизаарай социальна һалбариин ажалтадай мэргэжэл дээшэлүүлгын институт» гэһэн эмхиин багша, жюриин гэшүүнээр ажаллаһан Хишигто Эрдынижаповна Жигзымаевагай мэдүүлһээр, «Барбаадай» мүрысөөн бүхы зорилгонуудаа хүсэд дүүргэнэ. «Энэ мүрысөөн 2012 онһоо эмхидхэгдэнэ. Жэлһээ жэлдэ үхибүүд олоор хабаадахаяа ерэнэ. Жэшээнь, мүнөө 36 үхибүүдэй шүлэг уншахые шагнабабди. Үхибүүдэй бэлэдхэл һайн. Эндэ хүмүүжүүлэгшэд, багшанар болон гэртэхинэй оролдолго эли тодоор харагдана. Үниндөө ондоохон байдаг һааб даа. Мүнөө хубсаһаниинь гоё, ёһо заршамуудаа баримталжа, зохидоор хубсалдаг, бүһэеэ зүбөөр бүһэлдэг болоһон байна. Тайзан дээрэ гараад, хутагаяа буулгаха гэжэ мэдэхэтэй болоо гэжэ ажаглааб. Тиихэдэ шүүгшэдэй зүбшэлнүүдтэ шагнаархажа, мүрысөөндэ үхибүүдые бэлдэһэн багшанар, хүмүүжүүлэгшэд элдэб янзын шүлэгүүдые шэлэдэг болоо. Тиимэһээ дабтаһан шүлэгүүд дайралдаагүй», - гэжэ тэрэ тэмдэглэбэ.
Официальный сайт Всебурятской газеты "Толон"
«Барбаадай» мүрысөөнэй удха шанар ехэ
- Информация о материале
- Автор: Долгор РАДНАБАЗАРОВА.
- Категория: Эхэ хэлэн
- Просмотров: 115
