Официальный сайт Всебурятской газеты "Толон"

   Эгээ түрүүн баяр ёhолол нээхэдээ, Буряад Уласай Толгойлогшо Алексей Цыденов: «...Мүнөөдэр түрэлхи хэлэндээ, угайнгаа заншалнуудта шэнэ хүсэ оруулха зорилготой иимэ hайхан зониие хаража байхада, зохид байна. Буряад арадай ёhо заншалнууд хадаа ганса үнгэрhэн сагай баялиг бэшэ, харин мүнөө үеын дэлхэйн соёлой хүгжэжэ байха амиды хуби болоно. «Алтаргана» наадамнай жэлhээ жэлдэ бүри хүгжэжэ байг. Буряад араднай дэлгэр тэнюун, жаргалтай байхань болтогой. Урагшаа, буряад арад!» – гээд хэлэhэн байна.
   Оросой Холбоото Уласай юрэнхы сайд Михаил Мишустин видео-дамжуулгаар амаршалхадаа, Россиин арадуудай нэгэдэлэй жэлдэ боложо байhан үйлэ хэрэгэй онсо удхатай байhые тэмдэглээ. «Энэ ехэ hайндэр хадаа хани барисаанай, хани харилсаанай hүлдэ тэмдэг болохо гэжэ этигэнэб. Орос гүрэнэй, Монголой, Хитадай арадуудай hайн байдал ба урган hалбарха хэрэгтэ зоной зүрхэ сэдьхэл нэгэдүүлхэ, хабаадагшадые, харагшадые соёлой баялиг сахиха, хүгжөөхэ хэрэгтэ улам урмашуулха…» гээд хэлээ. Мүн Оросой Холбоото Уласай Федеральна Суглаанай Федерациин Зүблэлэй түрүүлэгшын орлогшо Константин Косачёвой амаршалгын бэшэг Оросой Холбоото Уласай сенатор Альбина Кириллова уншаа.
   Саашадаа Буряад Уласай Арадай Хуралай түрүүлэгшэ Владимир Павлов болон Монголой Ехэ Хуралай гэшүүн, экономикоор хорооной түрүүлэгшэ Р.Сэддорж, Соёлой, тамирай, аяншалгын ба залуушуулай политикаар яаманай тамирай департаментын хүтэлбэрилэгшэ Д.Жаргалсайхан, Yбэр Байгалай хизаарай Засагай газарай түрүүлэгшын орлогшо, Агын Буряадай тойрогой Захиргаанай хүтэлбэрилэгшэ Ананда Дондоков, Эрхүүгэй можын амбан захирагшын орлогшо, Усть-Ордагай Буряадай тойрогой Захиргаанай хүтэлбэрилэгшэ Александр Гоголев, Бүгэдэ буряадай үндэһэн соёлой эблэлэй түрүүлэгшэ Чимит Бальжинимаев, Оросой Холбоото Уласай Баатар Дашибал Мункожаргалов гэгшэд амаршалаа. Энэ үдэр Буряад Уласай, «Алтарганын» түрын дуулалнууд зэдэлээ, гал гуламтые, нүүдэлшэдэй hэеы гэр тэмдэглэhэн тусхай бүтээлнүүд, суута дизайнернууд Игорь Саропуловай, Евгения Эрдынеевагай, Инна Будаевагай эскизүүдээр бүтээһэн гоё hайхан хубсаhатай дангинанар, манай ерээдүй – үхибүүд, сэрэгэй – патриотическа харалга мүрысөөнүүдэй хабаадагшад, «Движение Первых» мүрысөөнэй илагшад жагсаалые шэмэглээ, аса бүхэтэй алтаргана тухай арадай дуунай мүрнүүд нэгэтэ бэшэ агаарай долгёор дурадхагдаа. Дуушад хэдэн үеын дуунуудые бэлэглээ, морин хуурай, лимбын, ятагын хүгжэм сугларагшадай зүрхэ сэдьхэл уяруулаа. Харин арадаймнай газар газарай нютаг хубсаhан, зүүдхэл гоёолтонууд, жэнхэни буряад хэлэн ба нютаг үгэнүүд жэгтэй гоё hүр оруулаа ааб даа.
   Дэмбэрэлтэ hайндэрые «Шэдитэ Алтаргана» гэhэн зүжэглэмэл наадан үргэлжэлүүлээ. Тиихэдээ буряад арадай эртэ урдын сагhаа элдэб хэсүү байдалда орожо, хэдэн нютагуудаар тарабашье, нютаг орондоо дуратай, эбтэй эетэй, бүхэ голтой, сэсэн ухаатай, мэргэн, хүдэр байhанайхяа ямаршье сагта хагдаржа hалаагүй алтаргана мэтэ алтан үндэhэтэй гэжэ харуулагдаа. Буусаараа илгараагүй булган туруута буряад араднай хэтын хэтэдэ эб нэгэтэй, ёhо заншалаа сахижа, түрэл хэлэеэ мартахагүйнь лабтай! Алтаргана мэтэ бата бэхи үндэhэтэй, хухаршагүй нэрэтэй, нугаршагүй солотой буряаднай хэтэдээ мүнхэ!

You have no rights to post comments