Официальный сайт Всебурятской газеты "Толон"

   Бүгэдэ буряадай нааданда Үбэр Байгалай хизаар 500 гаран хүн түлөөлһэн байна. Тэдэ зохоёхы 18, тамирай 6 янзаар мүрысөөнүүдтэ хабаадажа, хамта 94 медальда хүртөө. Эндэ медальнууд шухала бэшэ, «Алтаргана» наадан Россиин олон нютагуудта, хари гүрэнүүдтэ ажаһуудаг угсаата арадыемнай нэгэдүүлнэ, соёл, хамтын түүхэ, хэлэ, ёһо заншал хүгжөөнэ. Байгал далай шадар ажаһуудаг гурбан нютагһаа гадна Россиин арба гаран хотодо, Хитадта, Монголдо, ажаһуудаг буряад угсаатан нааданда хабаадаа. Үбэр Байгалай хизаарай түлөөлэгшэдые үндэр хэмжээндэ угтан абаһан, наада эмхидхэһэн Буряад Уласай Засагай газарай дарганарта, гол түлэб, Толгойлогшо Алексей Цыденовтэ Ананда Дондоков баярые хүргөө. Фестивальда хабаадалгада горитойхон туһаламжа үзүүлһэн Үбэр Байгалай хизаарай амбан захирагша Александр Осиповто халуун баяраа мэдүүлһэн байна. Хэзээшье, энэ наада уласхоорондын хэмжээнэй болгохо хэрэгтэ асари ехэ хубита оруулһан сенатор Баир Жамсуевта гүн сэдьхэлһээ доро дохин, баяр баясхалан хүргэгдөө. Баир Баясхалановичай аша оролдолгоор олон тоото спонсорнууд, меценадууд мүнгөөр туһалаа. Сенатор Баир Жамсуев Улаан-Үдэ хотодо ажаһуудаг нютагайхидые ерэхэ жэл Агада үнгэргэгдэхэ «Зунай нааданда» аминдаа можо табихыень уряалаа. Олзын хэрэг эрхилэгшэ Аюр Цыденов ехэ туһалаа. Тэрэнэй эмхиин юһэн автобус ашаглагдаа. Шэнгэн түлишын хомор саг тохёолдобошье, нааданай эмхидхэгдэхэ найман зуугаад модо хүрэтэр газар хизаарай түлөөлэгшэд ядамаргүй хүрэжэ ошоо. Буряадай үндэһэтэнэй нэгэдэхи лицейн захирал Булат Шойнжоновто, Буряадай технологиин ба ойн ажахын колледжын хүтэлбэрилэгшэ, Ага нютагай хүбүүн Гурожаб Цэдашиевта баяр баясхалан хүргэгдэбэ. Тэдэнэй аша туһаар нютагайхиднай хамтын байрада байрлажа, халуун эдеэгээр хангагдажа байгаа. «Алтаргана» нааданай үедэ тойрогой Захиргаан Доржи Банзаровай нэрэмжэтэ Буряадай гүрэнэй ехэ һургуулитай холбоо барисаатай байхын тула хэлсээ баталаа. «Алтаргана» наадан 2028 ондо Эрхүүгэй можодо, 2030 ондо Үбэр Байгалай хизаар-та эмхидхэгдэхэ. Августын 1-дэ Алхана уулын үбэртэ «Большой приз Алханая» заншалта мүрысөөнэй үедэ «Алтаргана-2026» нааданда лауреадууд, тамирай мүрысөөнүүдтэ илагшад болоһон зон шагнагдаха юм.

You have no rights to post comments