Официальный сайт Всебурятской газеты "Толон"

   Хэмжээ ябуулгада Агын Буряадай тойрогой Захиргаанай хүтэлбэрилэгшэ Ананда Дондоков, Россиин Федерациин сенатор Баир Жамсуев, Үбэр Байгалай хизаарай амбан захирагшын орлогшо Аягма Ванчикова, Үбэр Байгалай хизаарай Хуули тогтоолгын Суглаанай түрүүлэгшын 1-дэхи орлогшо Сокто Мажиев, Россиин Баатар Балдан Цыдыпов, Агын, Дулдаргын, Могойтын тойрогуудай, Ага тосхоной захиргаануудай толгойлогшонор Насак Бабужапов, Дамдин Мижитдоржиев, Болот Намжилов, Болот Аюров, Ага нютагаархидай эмхиин түрүүлэгшэ Баясхалан Раднагуруев гэгшэд хабаадаа.
   Түрүүн Баясхалан Раднагуруев «Агинское землячество» ниитэ эмхиин ажаябуулга тушаа тобшохоноор хөөрөө. Тэрэнэй мэдээсэһээр, «мүнөө Улаан-Үдэдэ Агын Буряадай тойрогһоо гарбалтай 20000 гаран хүн ажаһууна. «Агын землячество» Буряад Уласай үндэһэ яһатанай нэгэдэлдэ бата бэхи һуури эзэлжэ, түрэл тойрогоо эрхим һайнаар түлөөлжэ ябана, Буряад Уласай, Улаан-Үдын ниитэ ажабайдалда, элдэб хэмжээ ябуулгануудта эдэбхитэй хабаадана».
   Удаань бүгэдэ сугларагшад, Улаан-Үдэдэ ажаһуужа байһан нютагаархиднай фильмын ашаар Агын Буряадай тойрогой социально-экономическа хүгжэлтэтэй, Үбэр Байгалай хизаарай Засагай газарай ажаябуулгын дүнгүүдтэй танилсаа, Агын Буряадай тойрогой Захиргаанай ажаябуулга тушаа элидхэл шагнаа.
   Россиин сенатор Баяр Басхаланович хүшэр сагта «Алтаргана» наада үнгэргэлгын зорилго тухай тэмдэглээ: «Сэрэгэй тусхай үйлэ хэрэгэй боложо байһан бэлэгүй саг. Гэбэшье, бэеэ һамааруулхын, хатарха сэнгэхын тула бэшэ, харин буряад арадаа нэгэдүүлхэ, нютаг можонуудай, хүршэ гүрэнүүдэй хоорондохи холбоо барисаа бэхижүүлхэ зорилготойгоор мүнөөдэрэй уласхоорондын наадан эмхидхэгдэнэ гэжэ булта ойлгонобди». Мүн Баир Баясхаланович Үбэр Байгалай хизаарай тон хүндүүлхэй асуудал – түрэл нютагһаа зоной нүүжэ ошолгодо болон бэшэшье үйлэ хэрэгүүдтэ хандуу-лаа. Түгэсхэлдөө ажал хэрэгүүдээрээ, зүбшэл заабаринуу-даараа түрэл тойрогойнгоо хүгжэлтэдэ горитой хубитаяа оруулжа ябаһанайнь түлөө Улаан-Үдэдэ ажаһуудаг нютагаархидтаа баяр баясхалан хүргөө.
   Хэмжээ ябуулгын эсэстэ бүлэг зондо Россиин Федерациин сенаторай, Үбэр Байгалай хизаарай Хуули тогтоолгын Суглаанай түрүүлэгшын, Агын Буряадай тойрогой, Агын, Дулдаргын, Могойтын муниципальна тойрогуудай, Ага тосхоной захиргаануудай баярай бэшэгүүд, Үбэр Байгалай хизаарай Засагай газарай Хүндэлэлэй грамотанууд барюулагдаһан байна.

You have no rights to post comments