Официальный сайт Всебурятской газеты "Толон"

   Абань хүбүүгээ дарханда һургаа
   Бурханһаа үршөөгдэһэн бэлигтэй уран гартан Москва, Санкт-Петербург хотонуудта ажалаа ябуулдаг. Хэрэгээрээ хари гүрэнүүдээр ябадагшье һаа, зүрхэ сэдьхэлынь түрэл Ага руугаа таталдадаг байһаар. Агаяа ерэхэ бүреэ өөрын байгуулһан уран гартанай дархашуулай мастерской хүрэжэ, Амидхаашада ажаһуудаг аба эжыгээ, эгэшэнэрээ эрьежэ байдаг шуу. Эндэ һая буряад эритэ зэбсэг бүтээг-шэдэй уласхоорондын эблэлдэ (МАБО) һуралсал гарагшадта үнэмшэлгэнүүдые барюулаа һэн. Тиихэдэ Жигжит Баировичтай уулзажа, намтараарнь, дархалха, урлаха бэлигэй замаарнь һонирхоо һэм.
   Ага нютагай эрхим хүбүүдэй нэгэн Жигжит Баясхаланов Зүдхэли нютагһаа уг гарбалтай Баир Батодоржиевич ба Цындыма Нордоповна Баясхалановтанай гэр бүлэдэ 1985 ондо дүрбэн хүүгэдэй одхониинь боложо түрэһэн. Жигжидэй хүлөө шоройдоһон газар Алхана нютаг болоно. Гурбатай байхадань, гэртэхиниинь Алханаһаа Амидхааша нютаг зөөжэ ерэһэн. Бага балшар наһаниинь Агын дасанай хажууда үнгэрөө.
   Хэнэйшье мэдэһээр, Жигжидэй аба эжынь Амидхааша нютагтаа хүндэтэй зон юм. Баир Батодоржиевич шүлэг найруулан бэшэхэ дуратай, гартаа дүйтэй, ташуур, һурша номо, хутага, мүнгөөр, эрдэниин зүйлнүүдээр дархалха шадабаритай. Һурша номоор мэргэнээр харбадаг. Цындыма Нордоповна – муниципальна албанай ветеран. «Амидхааша» хүдөө нютагай захиргаанай толгойлогшоор олон жэлдэ ажаллаһан. Баир Баясхаланов урлаха, дархалха дүршэлөө хүбүүндээ дамжуулаа.
   Жигжит бага наһанһаа абынгаа ажал хэхые анхаран хаража, ехэ юумэндэ һураһан, өөрөөшье хэжэ туршадаг болоһон. Тэрэ Амидхаашын дунда һургуулиин шаби ябахадаа, абынгаа зэмсэгүүдээр түмэр тоншожо, ямар нэгэ юумэ дархалжа, ювелирнэ бүтээлнүүдые хэлгээр бүри һонирхожо эхилээ һэн. Түрүүшын бүтээлынь хадаа хүршэдөө шабын түмэрөөр нариихан бэһэлиг хэжэ бэлэглэһэн байна. Тэрэ гэһээр Жигжит шадабарияа мүлижэ, урлалай ажал тогтон торонгүй ябуулдаг болоо бэлэй. Тиигэжэ эдир хүбүүнэй ехэнхи сагынь абынь мастерской соо үнгэрдэг болоо. Үетэн нүхэдэй-нгөө үдэшын сагта дискотекээр сэнгэжэ ябахада, Жигжит үнөөхи мастерской соо ямар нэгэ юумэ дархалжа байха. Заримдаа бүхэли һүни унтангүй шахуу ажал хэхэ сагууд гараха даа. Тиихэдэнь аба эжынь хүбүүндээ амархыень һануулдаг байха. Унтангүй хоножо хэһэн түрүүшын томо бүтээлынь – хутага. Жигжидэй хэлэһээр, тэрэ хутага аба эжынь мүнөө болотор эдеэ хоол бэлдэлгэдэ хэрэглэжэ байдаг.

You have no rights to post comments