Һунгалтын участогууд заншаһан ёһоороо үглөөнэй 8 сагта нээгдээд, үдэшын 8 сагта хаагдажа байха юм. Агын Буряадай тойрогой дэбисхэр дээрэ һунгалтын 60 участок ажал ябуулжа эхилэнхэй.
Тойрогой Захиргаанай хүтэлбэрилэгшэ Буянто Батомункуевай ударидалга доро һунгалтын хэмжээ ябуулгануудые эмхитэйгээр үнгэргэхын тула ажалай бүлэг байгуулагдаһан.
«Манай зорилго – һунгалта эмхитэйгээр үнгэргэлгэ, участково һунгуулиин комиссинуудай ажалда туһаламжа. Мүн һунгалтын байрануудые зайн галаар, хэлхеэ холбоогоор, дулаагаар хангалга хинаха ёһотойбди», - гэжэ тээсгэн үнгэргэгдэһэн ажалай бүлэгэйхидэй зүблөөн дээрэ Буянто Батомункуев тэмдэглээ.
Ажалай бүлэгэй гэшүүн, тойрогой Захиргаанай инфраструктура хүгжөөлгын таһагай даргын орлогшо Булат Раднаевай мэдээсэһээр, һунгалтын участогууд дээрэ тон ехэ анхарал коронавирус үбшэнһөө һэргылгэдэ хандуулагдаха. Һунгагшад болон һунгуулиин комиссиин гэшүүд үбшэнһөө хамгаалгын хэрэгсэлнүүдээр хангагдаха, һунгалтын байра соохи бүхы хэрэгсэлнүүдтэ, эд бараанда дезинфекци хэгдэхэ. Харин һунгалтын участок ерэжэ шадахагүй зондо нүүдэл һунгалта эмхидхэгдэхэ гэжэ тодорхойлогдоо.
Тиихэдэ тойрогой табан һууринай: Могойто тосхоной, Догой, Сагаан-Уула, Бооржогонтой болон Ара Элеэ һуурингуудай ажаһуугшад нютагайнгаа толгойлогшые һунгаха юм.
Дарима БАЗАРОВА.
