Хуралдаанай хэмжээндэ өөр өөрын сэдэбтэй ба шэглэлтэй зургаан секци ажаллаа, мүн пленарна зүблөөн эмхидхэгдээ. «Алтаргана» нааданай түүхэ ба тэрэнэй үндэһэн соёлоо мүнөөнэй эрхэ нүхэсэлдэ сахилгада, яһатанай оюун ухаа хүгжөөлгэдэ нүлөөлһэн үүргэ тухай секцидэ гүрэнэй засаг зургаанай, нютагаа өөһэдөө хүтэлбэрилхэ зургаанай, ниитын, залуушуулай, буддын шажанай эмхинүүдэй түлөөлэгшэд хабаадаба. Удаадахи секцидэ «2030 он болотор буряад хэлэ хүгжөөлгын арга боломжонууд тухай» гэһэн программа бэелүүлгын асуудалнууд харагдаа. Бэшэ секцинүүдтэ соёл хүгжөөлгэ, үндэһэн тамир, заншалта ажахы эрхилэлгэдэ этно-аяншалга хүгжөөхэ тухай болон мүнөө үеын буряад хэлэтэ олондо мэдээсэл тараадаг хэрэгсэлнүүдэй хүгжэлтэ ба хүндүүлхэй асуудалнууд тухай элидхэлнүүд хэгдээ.
Хэмжээ ябуулгада сенатор Баир Жамсуев, Үбэр Байгалай хизаарай Засагай газарай түрүүлэгшын орлогшо, Агын Буряадай тойрогой Захиргаанай хүтэлбэрилэгшэ Буянто Батомункуев, Монголой Юрэнхылэгшын албан хэрэгүүдэй хүтэлбэрилэгшын орлогшо Алтанхуягийн Уйлстөгөлдөр, Үбэр Байгалай хизаарай амбан захирагшын орлогшо Аягма Ванчикова, Хитад гүрэнһөө шэнэхээн буряадуудай түүхэ, соёл шэнжэлэлгээр бүлгэмэй ахалагша эрдэмтэ хүдэлмэрилэгшэ Толото аха, Эрхүүгэй можын амбан захирагшын орлогшо, Усть-Ордагай Буряадай тойрогой Захиргаанай хүтэлбэрилэгшэ Анатолий Прокопьев, Буряад ороной СО РАН-ай монголоведениин, буддологиин болон тибетологиин институдай ахалагша эрдэмтэ хүдэлмэрилэгшэ Дамдин Бадараев гэхэ мэтэ хабаадаһан байна.
Долгор РАДНАБАЗАРОВА.
