Борлой БОЛОТОВ (Һүдэнтэ), 86 наһатай, багшын ажалай ветеран:
- Буурал сагаан толгойтой боложо ябаһан тойрогойнгоо наһажаал болоһон зоноо Наһатайшуулай үдэрөөр амаршалха дуран хүрэнэ. Наһан соогоо гүрэн түрэдөө аша туһатай хүдэлмэри хэжэ, мүнөө наһанайнгаа амаралтада гараһан аха үеын зон алтан дэлхэй дээрэ үндэр наһа наһалжа, үри хүүгэдээ, аша зээнэрээ харалсажа, үнэр баян ажаһуухатнай болтогой! Наһатай болообди, хэхэ ажалаа хээбди гэжэ байнгүй, ниитэ зоной дунда хам оролсожо, залуушуулһаа үлэнгүй, юумэндэ эдэбхитэйгээр хабаадалсажа ябаял гэжэ хүсэхэ байнаб.
Минии бага наhан дайнай үеын хүндэ хүшэр жэлнүүдтэ үнгэрөө. Һүдэнтын тала дайдаар тугал буруугаа адуулhаар, эжынгээ даажа байhан үнеэдые hаалсаhаар, арбаадхан наhамни үнгэрөөл даа. Дайнай үедэ талха таряанай ехэ хоморшье hаань, үмсэдөө малтай ажалша бүхэриг айлнууд сагаан эдеэгээр, үндэгэн болон мяхаар таhалдаагүй. Би түрэл Һүдэнтэ нютагтаа эдир үетэниие эрдэм бэшэгтэ һургаха ажалда олон жэл хүдэлһэн байнаб. Багшаар ажаллажа, хэдэн үе залуу һүрэгтэниие һургаһан байгдана. Шабинарни элдэб һалбаряар ажаллажа, нютаг нугадаа мэдээжэ, бэрхэ мэргэжэлтэд болонхой. Багшын ажал - хүндэтэй мэргэжэл. Иигэжэ анха түрүүн шэлэhэн мэргэжэлээ дүүрэн эдлээб гэжэ хэлэхэдэ алдуугүй. Наһатайшуулай үдэр угтуулан, минии шабинарай, һургуулиин багшанарай манайда ерэжэ, бэлэг барижа, һониноо хөөрэхэдэнь, угаа зохид байдаг.
Урданай багшанар шанга журамтай байһан гээшэ. Журам хазагайруулһан шабинар шанга хэһээлтэ абадаг һэн. Бидэ бага байхадаа, наhатай ба аха хүнүүдтэй уулзахадаа, малгайгаа абажа дохин мэндэшэлдэг һэмди. Наhатай ба аха хүнүүдтэй харгыгаар ябахада, урдуурнь хүндэлэн гарахагүй. Оршон сагта ёһо заншалнай мартагдажа байна гү гэжэ һанахаар байдаг. Багша хүн үхибүүдтэ шангаар бадашажа, хараажа байхагүй, зохидоор ойлгуулха, хэлэжэ үгэхэ ёһотой. Үхибүүдэй толгой соо ойлгосын үлэхын тула хэшээлдээ ерэхэдэнь, дабтажа һургаха хэрэгтэй. Тиихэдэ юумэ бүхөөр хадуудаг һэн.
Эрдэни ЧИМИТДОРЖИЕВ.
