Долгор Цыбенжапова (һүдэнтэ), 85 наһатай, ажалай ветеран:
- Наһатайшуулай үдэрөөр тойрогойнгоо наһатай зониие амаршалжа, ута наһа, энхэ элүүрые хүсэжэ, үреэлэй һайхан үгэнүүдые дамжуулнаб: жара хүрэжэ, жаргажа ябагты, дала хүрэжэ, далайжа ябаарайгты, ная хүрэжэ, налайжа, ерэ хүрэжэ, ербэгэнэжэ һуугаарайгты даа.
Би Агын аймагай Һүдэнтын Ждановай нэрэмжэтэ ажахыда 1950 гаран оной дунда үеэр шэнэ, тунга газар бэлдэжэ, таряалан, полиин хүдэлмэридэ ябаһанби. Ждановай нэрэмжэтэ ажахын таряашад Улаан Хүүтэр, Улаан Туяа гэжэ hуурингуудай газар дээгүүр үргэн талмай газарта поли хахалжа, таряа ургуулдаг байгаа бшуу. Хүдөөгэй хара ажалда залуухан басаган ябахаhаа дүршэhэн байгдана. Тэндэ газар хахалдаг тракторна бригадада анзаhан дээрэ hуужа, газар хахалһанби. Тракторист, прицепщигүүд үргэhэ нойргүй, поли дээрэ үнжэн хонон, орооhото зүйлнүүдые таридаг һэмди. Анзаhа шагтагалхаhаа гадна тракторай жолоошье мушхаhан байнаб. Тунга газар хахалhанай түлөө «За освоение целины» гэhэн медаляар шагнагдаhанби. Наhан соогоо Һүдэнтын hү hаалиин фермэдэ hаалишанаар ажаллажа, олон тоото грамота, баярай бэшэгүүдээр шагнагдаhан габьяатайб. Мүнөө 85 наhатай, түрэл нютаг дээрээ ажана тэнюун ажаhуунаб даа.
Залуу зондо ёһо заншалаа мэдэжэ, түрэлхи буряад хэлэеэ алдангүй, дээшэнь үргэжэ ябаха хэрэгтэй. Аба эжыгээ хүндэлжэ, урдуураа гараһан зониие ундалуулжа, хойгуураа гараһан зониие хооллуулжа ябахань буян. Залуу һүрэгтэндэ хүдөө гаража, угсаата арадайнгаа ёһо заншалаар табан хушуута мал үсхэбэрилхэдэ болохо. Гүрэн түрэмнай хүдөө ажахынхидта дэмжэлтэ үзүүлдэг болонхой. Ажал хүдэлмэри техникын хүсөөр амар бүтэдэг болоһон гээшэ. Бидэнэй залуу ябахада, техникэ гэжэ мүртэй байгаагүй ха юм.
Эрдэни ЧИМИТДОРЖИЕВ.
