Валерий Дугаров, (Догой), 76 наһатай, муниципальна албанай ветеран:
- Үндэр наһатай үбгэд, хүгшэдые һайндэрөөр амаршалнаб. Энэ хүндэ сагта, тахал үбшэнэй һүжэрһэн үедэ, бэе бэеэ гамнажа, дүнгэжэ ябаял даа.
Гүрэн түрэмнай маанадаа, наһатайшуулаа, анхаржа, дэмжэжэ байдаг. Хүнгэлэлтэтэй эм дом, аргын газарта ябалга гээд олон. Би наһанайнгаа амаралтада гаратараа, түрэл нютагайнгаа муниципальна албанда олон жэл хүдэлөөб. Амаралтада гараад, Ага тосхон зөөжэ ерээ һэмди. Түрэл Догой нютагай захиргаанай мэргэжэлтэдэй ерэжэ, Наһатайшуулай үдэрөөр амаршалхадань, ехэ хүхидэгби. Наһатай хүндэ хүхихын тула ехэ юумэн хэрэггүй гэдэг. Нютагайнгаа хүбүүд басагадые харахадаа, сэдьхэлни урмашадаг. Улаан-Үдын хүдөө ажахын дээдэ һургуули түгэсхэжэ, инженер-механик мэргэжэлтэй боложо, Догойнгоо ажахыда ехэнхи наһаяа ажаллааб. Хожомынь Догой нютагай захиргаанай толгойлогшоор 2 болзорто ажаллаһан байгдана. Нютагаа өөһэдөө хүтэлбэрилхэ албанда ажаллаха сагтаа олон хүнтэй харилсаха, танилсаха хубитай байгдаа. «Агын тойрогой муниципальна албанай габьяата хүдэлмэрилэгшэ» гэһэн хүндэтэ нэрэ зэргэдэ хүртөө һэм. Эдир багаһаа барилдаанда дуратай байжа, мүнөө болотор эрын гурбан наада хаража һонирходогби. Ага тосхондо эдир хүбүүдэй, эрэшүүлэй хоорондо үнгэргэгдэдэг тамирай мүрысөөнүүдые хаража, сэдьхэлэй дүүрэн хангалта абадагби. Советскэ Союзай Баатар Базар Ринчиногой, бэлигтэй хүтэлбэрилэгшэ ябаһан Бадма Цыреновэй мүнхэ дурасхаалай мүрысөөнүүдые жэл бүри алдангүй харахые оролдодогби. Холо ойгуур үнгэргэгдэһэн мүрысөөнүүдтэ нютагай хүбүүдэй амжалта туйлахадань, ехэ омогорходог гээшэб.
Оршон сагта муниципальна албангуудта залуу зон барагсаан ажаллана. Залуушуулай засаг бариха саг ерэнхэй. Тэдэ өөрын хараа зорилготой, түсэбтэй ерэнэ бшуу. Нютагай зоной һанамжа, һонирхол дуулажа, засаг зургаанай албанда хүдэлһэн зонһоо зүбшэл, дүршэл абажа, ажалаа эмхидхэхэнь шухала.
Эрдэни ЧИМИТДОРЖИЕВ.
