Цырен-Дулма Удбылова (Амидхааша), 68 наһатай:
- Наhатай аха захатан, эжынэрые Наһатайшуулай үдэрөөр амаршалаад, бүмбэрсэг алтан дэлхэй дээрэ ута наһа эдлэжэ, энхэ элүүр, амар амгалан ажаһуухыетнай хүсэнэб. Залуу зондо хэлэхэ ушартайб: «бууралһаа үгэ дуула, болоһонһоо ама хүрэ» гэдэг оньһон үгэһөө жэшээ абажа, наһатай зониие хүндэлжэ ябагты. Эхэ эсэгын һургаал үнэтэй юм. Арадай нангин һургаал заабаринуудые Удбыл Цыбенова эжымнай багадамнай хэлэжэ байдаг һэн. Бүхы наһаараа XXII партсъездын нэрэмжэтэ ажахыда түрүү хонишон ябаһан, нарин нооһото үүлтэрэй хонидой бии бололгодо горитойхон хубитаяа оруулалсаһан юм. Мал яажа ажаллахаб гэжэ ойлгуулдаг, хэлэдэг байһан. Би эжынгээ хэрэг үргэлжэлүүлжэ, мал ажалда наһаяа зорюулһанби. Буряадай гүрэнэй хүдөө ажахын институдта һуража, зоотехник мэргэжэлтэй болоо һэм. Тойрогой хүдөө ажахынуудта зоотехнигээр хүдэлөөб. Һүүлдэ Могойтын аймагай захиргаанай хүдөө ажахын таһагта ахамад зоотехник ябааб. Тэндэ ажаллаха үедөө бэлигтэй хүтэлбэрилэгшэ Намсарай Ленхобоев, Ажалай Алдар Солын орденой дүүрэн кавалер Цырендаши Цыдыпов ба бусад зонтой ажаллаһан байнаб. Удаань Агын тойрогой үүлтэртэ албанда ажалда орожо, наһанайнгаа амаралтада гаратараа хүдэлһэн намтартайб. Тэндэ хүдэлхэдөө, Россиин габьяата зоотехник Вениамин Вяловтай суг ажаллаха хубитай байгдаа. Хаанашье хүдэлхэдөө, хүдөө буусануудаар ябажа, залуу малшадта мал ажаллаха талаар зүбшэл заабаринуудые үгэдэг байгаабди. Мал һайнаар ажаллаха, хабартаа малай түрэлгэ соогуур, намартаа үрэжүүлгын кампани соогуур һайсал ябагдадаг һэн. Эжымнай хониной нооhоор hэеы дараха, тэрэ hэеыгээрнь колхозой ажалшад hэеы гэр баридаг байгаа. Мүн лэ hэеыгээр шэрдэгүүдые оёдог, эмээлэй тохом хэдэг байхаhаа гадна гутал, хубсаhа оёходоо хэрэглэдэг hэн. Хониной элдэhэн арhаар хүнжэл хэдэг, малгай, дэгэл, гутал оёдог байгаа. Хониной мяхаар шуhа, эреэлжэ, хошхоног, ормог, тархи, hугабша, шабай, арьбан, омhо, хята, бууза, банша хэжэ, малшадаа хүндэлдэг һэн. Мяхаяа борсолжо, аян замда ябахадаа гү, али ааяма халуун зунай сагта шүлэ шанажа уудаг hэмди.
Эрдэни ЧИМИТДОРЖИЕВ.
