Цырен-Дулма Матхеева (Табтаанай), 68 наһатай, багшын ажалай ветеран:
- Ажабайдалай үргэн зам гаталжа, мүнөө амаралтада гараһан зомнай ута наһа наһалжа, буян эдлэжэ, үри хүүгэдтээ үргүүлжэ, аша зээнэрээ энхэржэ байг лэ даа. Аша гушанараа харалсажа ябагты, хүүгэдтнай үгын зөөлэнөөр хандажа, эдеэнэй дээжэ амсуулжа, унтариин зөөлэндэ амаруулжа, таанадтаа түшэглэн ябаг лэ. Үри хүүгэд, аша зээнэртнай шанаhан сайетнай уужа, хүсэ нэмэн гараг лэ. Аша гушанараа харалсажа, баярыень хубаалдалсажа ябахаhаа ехэ жаргал аба эжы хоёрто байха аал?
Би багшанарай бүлын үри һадаһанби. Манай аба эжы нютаг нугадаа мэдээжэ багшанар ябаһан. Абамнай, Цырендоржи Дамдинов, дайшалхы Алдар Солын 2 шатын орденоор шагнагдаһан, Намгар Дамдинжапова эжымнай Эхэ-герой, бэлигтэй багша ябаһан. Арбаад хүүгэдые түрэжэ, алтан дэлхэйн шарай танюулжа, хүн болгоhон юм. Хүүгэдээ зүб мүрөөр хүмүүжүүлжэ, эрдэм олгуулаад, эрхим түрүү зон болгохо гээшэ ехэ буян гэжэ һананаб. Манай аба эжы урданай ёһо заншал мэдэхэ, үри хүүгэдтээ, аша гушанартаа дамжуулха гэжэ оролдодог һэн. Аба эжынгээ нангин хэрэг үргэлжэлүүлжэ, би Табтаанайн дунда һургуулида олон жэлдэ багшалааб. Ургажа байгаа үетэниие хүмүүжүүлжэ, эрдэм олгуулжа, ажабайдалай үргэн харгыда гаргаха гээшэ ехэл дэмбэрэлтэй хэрэг ха юм. Манай бүлые тон хүндэтэйгөөр hанажа ябаха зон олон. Һурагшадайм дундаhаа эрдэмтэдшье, хүтэлбэрилэгшэдшье, дээдэ гарай элдэб мэргэжэлтэд, юрэл «хүн» нэрэеэ дээрэ үргэжэ ябаhан зон олон гараhан гэжэ омогорхожо ябадагби.
Эрдэни ЧИМИТДОРЖИЕВ.
