Намнанай лама - хүсэ ехэтэй ёгоозори, шэдитэн (сиддхи) - Далай ламада ном зааhан Агваан Доржиевай багша юм. Тэрэ бисалгал хэжэ, Алхана уулые бурханай орон болгоhон. Буддын hургаалаар ном табидаг бүтээлшэ лама бэшэшье газарнуудта даяанда hуужа, зон амитанай түлөө зальбарал хэhэн, дасан дугангуудта хэсүү сагай ерэхэдэ, Санкт-Петербург хото ошожо, буддын шажан аршалалсаhан намтартай. Ага нютагайхид, түрэл гаралынь тоонтодонь су-барга бодхоожо, буянта хэрэг бүтээhэн. 2007 оной августын 27-до Россиин бандида хамба лама Дамба Аюшеев түрүүтэй олон ламанар иишээ ерэжэ, нангин субаргада рамнай үргөө hэн. Тиигэжэ хүн зон 11 метр үндэртэй томо субаргын газаа досоогуур ябажа, гороо, мүргэл хэдэг болонхой. Илангаяа Алханада мүргэхэ, аршаанда орохо хүнүүдтэ түрүүн Намнанай багшын субаргада зальбаран гороолоод ошоходонь, hайн гэхэ.

Мүнөө субаргада заhабарилгын ажал хэхэ хүнүүдтэй уулзахадамнай, Ага тосхондо ажаhуудаг Балдандоржи Сухобаторов нүхэдтэеэ, үри хүүгэдтэеэ суг гэрэйнгээ газаа субаргын 160 метр утатай хорёодо таарахаар нилээд олон түмэр армагуудые, хашаагай хаалта гагнажа бүтээhэн байба. Тэдэнэр газаа ламанарай уншалга хэхэ түхеэрэлтэ - гурбан тээhээнь түмэрөөр бүригдэhэн армаг hарабша, hандали хээ бшуу. Олон хүрдэнүүд, түмэр столбнууд бэлдээтэй. «Субаргын орой дүрбэн тээһээнь налуу болгожо, түмэр листнүүдээр хушахаяа байнабди. Модон рамануудые дархалха, бетоноор шудхажа жэгдэлхэ ба бэшэшье нарин ажалнууд бии юм. Алханын гороогой урда талын 27 хүрдэ абаашажа табихабди. Намнанай багша шуhан түрэлнай. Тиимэhээ нэрэеэ нэрлүүлхын түлөө бэшэ, хэхэл ёһоороо хэнэбди. Заhабарилгада ганса бидэ хабаадана бэшэбди, нютагайхид, юрын зон булта хамhалсадаг. Һаяхан аргалиинхид, hүдэнтынхид мүнгэн хандиб үргөө. Һүзэгтэй, шадалтай залуушуулай ажал хэжэ байхыень харахада урматай, гоё байдаг даа», - гэжэ Балдандоржи Сухобаторовай Баир ахайнь тэмдэглээ hэн.

Анхан субаргын барилгада олон хүн хандиб үргэhэн. Жэшээнь, Намнанай багшын байhан газараар хони малаа hайса адуулhан суута хонишон, Россиин Баатар Бабудоржи Михайлов барилгашадта хонин бэлэг үгөө бэлэй. Тэрэ Намнанай багшын даяанда hуудаг Дүрөө Шулуу hэргээhэн хүн юм. Барилгашан мэргэжэлтэй Оротов Дамба аха субаргын барилгада ехэ оролдолго гаргаhан. Субаргын шүндэ Будда бурханай 100 мянган дүрсэ, Намнанай багшын хонхо, бүhэ, номууд, үнэтэ үрил г.м. оруулагдаа. Сагаан-Шулуутай нютагай Хусын Гомбо аха Ганжуурай 108 боти ном холын оронhоо залажа асарhан. Сагаан-шулуутайнхид (толгойлогшонь - Эрдэнижаб Дашицыренов) 20 гаран жэлэй саана даяанай жаахан гэр ба модон хорёо тойруулан баряа hэн. Тэрэнь хууяа газарта ордоhолhон дошхон hалхинда, мүн үхэр малай шүргөөхэдэ, бутаран hандараад, мүнөө заhабарилгада ороод байна.

«Буянта hара соогуур субарга шүтөөнүүдээ өөдэнь татаял даа. «Шоймпрол шодон» субарга ганса хүнэй хүсөөр бэшэ, олоной оролдолгоор бүтэhэн. Нютагайхид, туhа хүргэхэеэ hанабал, тиишээ ошоод хүдэлхэдэтнай болохо, үгышье hаа Агын дасан ерэжэ, «Намнанай багшын субаргын заhабарилгада» гэжэ бэшээд, хандиб үргэбэлтнай, бүри hайн байгаа», - гэжэ Алханын дуганай Ошор даа лама хэлээ hэн.

You have no rights to post comments