Дүрбэн үнэн
Шэгэмүүни бурханай hургаалай эгээл эшэ үндэhэниинь дүрбэн үнэн тухай номнол болоно. Тэрэ юун бэ гэхэдэ, энэ манай оршон байдал мүнхэ бэшэ, хүн бүхэн мүнхэ бэшэ, хэзээшье үбшэлжэ, үтэлжэ, үхэжэ болохо. Yхэл гээшэ хүниие хэзээшье абаашажа болоно, тэрээндэ ямаршье хэлсээн, болзор гэжэ үгы дээрэhээ хүн hанаа амар ябаха аргагүй, үдэр бүриингөө байдалда өөртөө, үхибүүдтээ, түрэл гаралнуудтаа үргэлжэ hанаагаа зобожо үнгэргэдэг. Тиихэдээ нэгэ үнэниинь - байhан байдалнай зоболон гэжэ үзэнэбди.
Хоёрдохи үнэниинь – энэ зоболондо шалтагаан бии. Тэрэ ехэ хүcэл, хомхой шунал, ганса өөртөөл hайниие хүсэхэ, гоё, баян болохо, тэрээниие абаха, энээниие олохо гэхэ мэтэ юумэн барагдахагүй. Дуратай юумэеэ олоо, абаашье hаа, тэрээндээ садахагүй, hанааниинь амархагүй.
Гурбадахи үнэниинь – энэ зоболонhоо гаража болохо. Өөрынгөө омогые даража, хомхой сэдьхэл, хүсэлөө номгодхожо, атаа жүтөөн, хобдог ябадал саража шадаа hаа, олон зоболонhоо мултаржа болохо.
Дүрбэдэхи үнэниинь – дундахи зам баримталжа ябаха. Энэмнай найман табсанhаа бүридэhэн харгы болоно: зүб хараса, зүб шиидхэбэри, зүб үгэ, зүб ябадал, зүб ажаhуулга, зүб эрмэлзэл, зүб ойлгосо, зүб hанал хандуулга.
