«Һургаалай домогуудые буддын шажанай гүн ухаанай зохёол гэжэ бодомжолжо, үдэр бүри ухаанай хэмжээлшэгүй дүрбэн байдал – дурлал, нигүүлэсхы сэдьхэл, баяр, сэдьхэлээрээ абталгагүй байлга гээшые үйлэдэжэ шадана гүб гэжэ бэеэ шэнжэлжэ уншагты», - гэжэ Агын дасанай Будажапов Даша лама хэлэнэ.
Сагаа бү һалгагты
Мулинкьяпутта нэгэтэ Бурхан багшада ерээд:
- Ном үзэхэдэм, дэлхэй мүнхэ гээшэ гү, али сагай хизаарлалгатай гү, үхэлэй һүүлээр наһан үргэлжэлдэг гү г.м. шиидхэгдээгүй асуудалнууд гарана, - гэжэ гайхалаа мэдүүлээ һэн. - Энээниие би зохидшооногүйб. Тиимэһээ эдэ һэжэглэлнүүдыем шиидхэжэ үгыт гэжэ Багшада ерэбэ гээшэб. Нэгэ юумэ мэдэхэгүй һаа, сэхэ хүн «Би энээниие мэдэнэгүйб» гэжэ хэлэхэ ха юм, - гэжэ Мулинкьяпутта хэлэбэ.
Бурхан багша өөрынхеэрээл ёгтолон һагад иигэжэ харюусаба:
- Мулинкьяпутта, урид шамда юун гэжэ хэлээ һэнбиб? Намда ерэжэ, шабимни боло гээ һэн гүб, дэлхэй мүнхэ гү, али бэшэ гү, ажабайдалай хүсэ шадал бэеынхитэй аб адли гү гэжэ һургахаа мэдүүлхэеэ һананаб гэжэ дурадхаа һэн гүб?
- Та тиигэжэ хэлээгүйт, Багша.
- Али ши шабитнай болохоо һананаб, дэлхэй мүнхэ гү, али бэшэ гү гэжэ ойлгуулжа үгэгты гээ һэн гүш?
Мулинкьяпутта иигэжэшье һураагүйб гэхэ баатай болоо.
- Нэгэ хүн, - гэжэ Багша үргэлжэлүүлбэ, - хорлогдоһон годлиһоо шархатаба. Тиихэдэнь нүхэдынь болон түрэлнүүдынь эмшэниие дуудаба. Хэрбээ үбшэн хүнэй «Энэ эмшэн хэн гээшэб, хэн гэжэ нэрэтэйб, ямар изагуурайб, ямар зэбсэгээр годли табигдааб?» гэжэ асуугаа һаань, юун болохоб? Энээнэй эсэс ямар байхаб даа?
- Тэрэ хүн үхэшэхэ бэшэ гү, - гэжэ Мулинкьяпутта харюусаба.
Тиихэдэнь Бурхан багша иигэжэ хэлээ:
- Хүнэй наһан богони, элшэ хүсэниинь хизаарлагданги. Гэгээрхээр бэшэ асуудалнуудта һамааралтагүй. Тиимэһээ, Мулинкьяпутта, минии нээһэн юумэн нээгээтэй, нээгээгүй юумыем нээгдээгүй гэжэ һана.
