Агын Буряадай тойрогой Түлѳѳлэгшэдэй суглаанай энэ жэлэй түрүүшын зүблѳѳн февралиин 8-да үнгэргэгдэбэ. Зүблѳѳе Түлѳѳлэгшэдэй суглаанай түрүүлэгшэ Цырен Цыренов хүтэлэн ябуулаа.
Үдэрэй гаршагта 7 асуудал харагдаһан байна. Тэрэ тоодо шажан шүтөөнэй объектнүүдые хамгаалгын асуудалаар хѳѳрэлдѳѳн болоо. Энэ асуудал засаг зургаануудай урда тээ бодхоохо эдэбхи үүсхэл бүлэг ажаһуугшад гаргажа, тэдэнэй зүгһѳѳ ажалай ветеран Гурожаб Бальжиров мэдээсэл хээ. Ушарынь гэхэдэ, Наринай Адагай дэбисхэр дээрэ, Жараанай нуур гэжэ газарта Намнанай багшын дурасхаалда зорюулагдаһан “Шоймпрол Шодон” субаргын дэргэдэ тодхогдоһон түмэр хайрсаг соохи үргэлэй мүнгэн 2016 оной зун хулгайда ороһон байна. Энэ ушар тухай мэдээсэл «Толон» газетэдэмнай гараа бэлэй. Удангүй хулгайшан баригдаһан байгаа, теэд тэрэниие хэһээхэ хуули үгы гээд табиха саг ерээ. Энэ субарга нэгэ дахин бэшэ, удаа дараалан тоногдоһон байна. Багсаахада, хулгайшад хэһээгдэхэгүйгѳѳ мэдэжэ, үлүү гарама хэтэрээ гү? Тиимэһээ субаргануудые харууһатай болгохонь шухала гэһэн асуудал табигдаа.
Намнанай багшада зорюулагдаһан субарга.
Полициинхид миин һуунагүй, иимэрхүү хулгайн ушар бүхэниие мүрдэжэ элирүүлнэ. Ганса энэ субарга бэшэ, үшѳѳ хаана, хэзээ, ямар объектнүүд һүүлэй хоёр жэлэй туршада тоногдоо бэ гэжэ Россиин МВД-гэй “Агинский” таһагай дарга Сокто Эрдынеев элидхээ. Тэрэнэй мэдүүлһээр, Агын “Дэшэн Һүндэблинг” дасанда, “Шоймпрол Шодон” субаргада, Ага найман эсэгын “Юндэн Шодон” субаргада, Догойн “Дуйнхор Шодон” ба Хүнхэрэй субаргануудта хулгай ороһон байна. Эдэ ушарнуудаар хоёр уголовно хэрэг үүдхэгдээ. Харин 5 ушарта хуули буса ябадал үгы гээд, хэрэг үүдхэгдээгүй. Юундэб гэхэдэ, гарзатаһан тала үгы - субарганууд гүрэнэйшье, нютагуудайшье мэдэлдэ ороногүй, мүн ямар хэмжээнэй гарза болооб гэжэ элирүүлхын оногүй – субаргын дэргэдэхи хайрсагууд соо хэды шэнээн мүнгэн байгааб гэжэ хэншье мэдэнэгүй.
Дэлгэрэнгыгээр 7-дохи дугаарта.
