Агын дасанай ба Алхана уулын 8 субаргын дунда Нянтай (гасаланhаа нүгшэhэн) субарга бии. Тойрогоймнай хүдөө нютагта иимэ субарга түрүүшынхеэ бодхоогдобо. Буддын тагаалал боложо, нирваанай хутаг олоhон ушарта зорюулагдаhан субарга хүнэй ухаан бодол хурса болгохо, нүгшэhэн хүнүүдэй харгы арюудхаха гэhэн удхатай.
Июль һарада Хабсагайтын (Ламын) үндэр гэжэ газарта дид хамба Дондукбаев Цырен ламхай ба Будалан нютагһаа гарбалтай, Агын дасанай гэсхы Жапов Амгалан лама хоёр субаргын бумба нюуһан байгаа. Будалан нютагайхид Агын дасанай лама санаартанай заабаряар барилгын, урлалай ажал эршэмтэйгээр хэжэ, Нянтай субарга 2 hарын туршада бодхоожо шадаа. Бурхан багшын номууд, Буддын олон дүрсэ, юhэн эрдэниин зүйлнүүд - алтан, мүнгэн, түмэр, зэд, номин, оюун, шүрэ, cубад, дун, нютагай баялиг - үлир, мойhон, орооhон г.м. субаргын шүндэ оруулагдаа.
Б.Цыренжапов (зүүн гарhаа), А.Жапов, А.Будажапов.
Аюр Будажапов дарха хэнэ.
Нютагайхид субаргын hуури табина.
Нянтай субарга барилгын үедэ. Амгалан ЖАПОВАЙ архивай фото-зураг. Амгалан ЖАПОВАЙ архивай фото-зурагууд.
Октябриин 9-эй аргагүй hайн, Бальжиниматай, Дашиниматай үдэр Хабсагайтын үндэртэ олон хүн сугларжа, дид хамба Цырен ламхай, гэсхы Амгалан, унзад Артём, Даша ба Аюр ламанар субаргын рамнай үргөө бшуу.
«Будалан нютагта субарга бариха тухай хөөрэлдөөн үнинэй болодог байһан. Мүнөө зун Цырен ламхайтай зүбшэжэ, Нянтай субарга барилгын ажал эхилээбди. Агын дасанай Эрдынеев Ринчин лама номой ёһоор субаргын хэсэг хубинуудай тааралдал, хэмжээ харуулжа үгөө. Цыренжапов Бадма гунир лама, Жапов Аюр лама гэгшэд шүн табяа. Урдань Будалан уулада түрүүн гараад, һүүлээрнь Хабсагайтын үндэртэ, тиигээд Баатар уулада обоонуудые тахидаг байгаа. Саашадаа Хабсагайтын үндэрэй Нянтай субаргын дэргэдэ обоо тахидаг болохобди. Субарга барилгада бүхы арад зомнай туhаламжа үзүүлээ, Агаһаашье нютагайхиднай ерэжэ хүдэлдэг байгаа. Энэ буянта ажал хэрэгтэ эдэбхитэйгээр хабаадаһан Балта Батожаргалов, Баиржаб Дугаров, Аюр Будажапов ба бэшэнэй хубита ехэ юм», - гэжэ Амгалан лама хөөрөө hэн.
Субаргын удха шанар тухай хэлэбэл, Бурхан багша, сахюусад шүтөөнэй газар ерээд, нютагай зониие хаража туhалдаг гэхэ байна.
Жалсан ЛУБСАНДАШИЕВ.
