Эндэ һая Үбэр Байгалай хизаараар дид хамба Дондукбаев Цырен ламхай түрүүтэй Агын дасанай санаартан Аргалиин дабаан дээрэ бодхоогдохо субаргын бумба нюуһан байна.

   Мэдээжэ архитектор Болот Дондоковой зохёоһон түһөө түсэбөөр субарга 2,6х2,6 метр үргэнтэй, 5 метр үндэртэй байха юм. Түрүүн һууринь шудхагдаха, удаань субаргын шүн хэгдэхэ. Субарга федеральна харгын хажуу тээ, үндэр газарта бодхоогдохо, оршон тойронхи талмайнь болбосон түхэлтэй болгогдохо бшуу. Субарга руу гараха гэшхүүр хэгдэхэ, амаржа һууха һандалинууд, туалет түхеэрэгдэхэ юм. Дид хамба Цырен ламхайн тайлбарилһаар, ехэ харгын хажууда нангин шүтөөнэй гуламта байгуулха һанаан үнинэй байһан. Дабаан дээрэ харгын аюул, осол олоор ушардаг. Субаргын бодоходо, жолоошодой унаагаар түргөөр гүйлгэнгүй, шүтөөнэй газарта үргэжэ ябахань лабтай.

   Эрдэни ЧИМИТДОРЖИЕВ.

   

   Октябриин 20-до, монгол hарын 15-ай дүйсэн үдэртэ, «Жаншаб Шодон» субаргын рамнай болоо. 

Субарга. Ага-Хангилай буддын шажанай бүлгэмэй архивай фото-зураг. 

   

   Агын дасанай шэрээтэ Бадма ламхай, унзад Артём лама, Дондоков Биликто лама рамнай үнгэргэһэн байна. «Энэ субарга 2005 оной сентябрь hарада баригдажа рамнайлагдаа hэн. Харин орооhон ехээр хэгдэжэ, конденсат болоод, досоохинь шиигтэhэн байгаа. Мүнөө жэл бидэ, 49-дэхи жэлээ оруулжа ябаhан үхэр жэлтэн, энэ субаргын досоохииень абажа заhаха гэжэ бодообди. Субаргын рамнайлагдаһан байхадань, уншалга хэжэ, рамнайень абадаг, рамнайень абажа, толи дээрэ оруулдаг, тэрээнээ харагдахаар бэшээр хадагалдаг, hүүлдэнь субаргаяа заhаhан хойноо рамнайгаа hөөргэнь оруулдаг юм. «Алтан гэрэл», «Жадамба», «Сунды» гэhэн бурханай номууд субарга соо хэгдээ, тарнинууд, бурхад, ургамалнууд, алта мүнгэн гэхэ мэтэ олон зүйл ороо юм. Саашадаа дуган соохиёо hэргээхэ түсэбтэйбди, шэнээр гунгарбаа табихабди, Ганжуур, хэнгэрэг, сан зун абаабди, нютагаймнай оёдолшод лабри, бадан, жалсан оёхо юм. Холо ойро ажаhуудаг нютагайхидай, үбгэд хүгшэдэй, аха захатанай, залуушуулай оролдолгоор энэ ехэ хэрэгүүд hайн бүтээ», - гэжэ Дондоков Биликто лама хөөрэбэ.

   Цымжидма ДОЛГОРОВА.

 

   Октябрь hарын тэндэ Хальмаг ороной Яшкульска аймагай Тавн-Гашун тосхондо Бурхан багшын Түшэдэй тэнгэриhээ бууhан ушараар субарга бодхоогдоо гээд Elista.org сайт мэдээсэнэ. 

Хальмагай субарга. 

 

   Субарга бариха үүсхэл энэ нютагһаа гарбалтай Анатолий Манджиевтанай бүлэ гаргаһан байна.

   Субаргын рамнайда шаджин лама Тэло Тулку римбүүшэ түрүүтэй Хальмагай Түб хурулай ламанар хабаадаа.

   Хальмаг шажантанай толгойлогшо уншалгын урда тээ сугларагшадта ёhололой удха тухай иигэжэ хэлээ: «Эгээ шухалань гэхэдэ, санаартанай уншаха маани, мэгзэм бэшэ, нэн түрүүн, танай һүзэгэй ушар шалтагаан болоно. Ямар зорилготойгоор мүнөөдэр ерээбта? Буян үйлэдэжэ, оюун ухаанай хүсэ абахын болон hанаhан хэрэгээ бэелүүлхын тула ерээ ха юмта». Гадна баригдаһан субарга бүхэн ганса хальмаг арадта туһатай бэшэ, элдэб яһанай зоной нэгэдэжэ, зориһондоо хүрэхын һайн жэшээ болоно гэжэ тэмдэглээ.

   «Энэ субарга гэр бүлын гү, али уг удамай бэшэ, бүхы зоной, эхэ зургаан зүйл хамаг амитанай түлөө баригдаа. Субаргаяа буддын шажантанай хүтэлбэрилэгшын, Үндэр түрэлтэ 14-дэхи Далай ламын түргөөр Хальмаг орон ерэхынь түлөө зорюулхаяа һананабди», - гэжэ Анатолий Манджиевай Эрдни хүбүүн хэлэһэн байна.

 

   Эрхүүгэй можын Харганын дасанай горлом соо эблэрэлгын субарга бодхоогдожо, октябриин 1-дэ досоонь шүн хэгдээ. 

Субаргада «ами» оруулагдаба. vestiirk.ru сайтын фото-зураг. 

 

   Харганын «Тубдэн Даржелин» дасанай шэрээтэ Зоригто Батуевай хэлэһээр, шэрээтын тушаалда ороһоорнь, 10 жэл соо бодхоогдоһон түрүүшын субарга болоно. Субарга буддын шажан дэлгэрүүлэгшэ, агууехэ мастер, йогин, политическэ ажаябуулагша, санид хамба Агван Доржиевта зорюулагдаа. Энэ субарга Эрхүүгэй можын дэбисхэр дээрэ ажаһуугшадай эбтэй эетэй, амгалан тэнюун ажаһуухын түлөө баригдаа.

   Шүн табихын урда тээ уншалга үнгэргэгдөө, энэ үедэ субарга соо орохо хэрэгсэлнүүд арюудхагдаһан байна. Субарга руу һүзэгшэдэй асарһан үнэтэ шулуунууд, гоёолтонууд, элдэб залаата ургамал ба таряан ороо, гадна эмнэлгын ногоон, адис, хүжэ оруулагдаа, дээрэнь Бурхан багшын «Ганжуур» номой 108 боти г.м. хэгдэбэ.

   Субаргын рамнай нүгөө жэл үнгэргэгдэхэ.

   Нордоп БАБУЕВА.

You have no rights to post comments