Мүнөө зун дээдын үршөөлтэй багшанарай тоонтодо Агын дасанай лама санаартан хаа-хаанагүй уншалгануудые бүтээнэ. Тоолобол: Табтаанайда XIX бандида хамба Жамбал-Доржо Гомбоевой, Ушарбайн гэгээн Собоо ламын, Сүүгэлэй дасанда гүн ухаанай hургуули байгуулhан Һүдэнтын Лобсан-Чойбсоной, Хойто-Агада XX бандида хамба Жимба-Жамса Эрдынеевэй, Гүнэйн дасанай түрүүшын шэрээтэ ябаhан Сэсэн Сагаан ламын, Шандалиин Долгиин гэгээнэй, XIX бандида хамба Жамбал-Доржо Гомбоевой багша ябаhан Зүдхэлиин Осор ламын тоонтодо, субаргануудай дэргэдэ «Согшод» уншалга бүтээгдээ.
Мүн тиихэдэ август hарын тэн багаар Намнанай багшын тоонто нютаг Наринай Адагта, «Шоймпрол Шодон» субаргын дэргэдэ, уншалга эмхидхэгдэхээр хараалагдана.
Байгша оной июниин 5-да Шандалиин Золтын Хаймшаг hаарамбын тоонтодо, Согонтын аршаанай дэргэдэ Yбэр Байгалай хизаараар дид хамба Цырен ламхайн ударидалга доро субаргын hуурида ба уншалга хэхэ багахан гэртэ бумба нюугдаба.
Золтын Хаймшаг hаарамба 1877 ондо Шандалиин Согонтын аршаанай дэргэдэ Базаров Золтын гэр бүлэдэ түрүүшын үри боложо түрэhэн. Хара багаhаа шажанай номоор һонирходог, hүбэлгэн хүбүүн байhанайнь түлөө нютагайхидынь мүнгэ суглуулжа, Түбэдэй Лавран дасан эльгээhэн байна. Тэндэ hаарамбын зиндаа хамгаалаад, гэртээ бусаhан юм.
Валентина ЦЫРЕНЖАПОВА.
