Хүн зон дасан дуган таһалгаряагүй ябажал байдаг. Мүнөө залуу үетэнэй һүзэгтэй болоһониинь һайшаалтай. Шүтөөнэй газарта бэеэ яажа зүбөөр абаад ябаха ёhотойб гэhэн асуудал гарадаг.
Агын дасанай гэсхынэр - Чингиз лама (зүүн гарһаа), Амгалан лама.
Тиимэһээ бидэ Агын дасанай гэсхы Амгалан ламада хандажа, тайлбари үгэхыень гуйбабди. Дасанай хурал эмхидхэжэ, журам баридаг, зохидгүй ябадал үйлэдэлгые хорихо, тогтоохо үүргэтэй Амгалан лама иимэ харюу үгөө һэн: “Хүн үбдэхэ зобоходоо, үгышье hаа сэдьхэлээ зобоходоо, нэгэ юумэ ойлгожо ядахадаа, дасан хүреэн ерэдэг. Ехэнхи ушарта хүн hайн байдалhаа ламада хандана бэшэ, элдэб шалтагаан тохёолдодог. Дасан ниитын газар ха юм. Тиимэһээ Эхэ зургаан зүйл хамаг амитан бүгэдэ hайн, ажал хэрэг урагшатай байг гэжэ сэдьхэхэ, хамаг юумэ зүб тээшэнь бодожо, бэеэ наряар абажа ябаха хэрэгтэй гэжэ һанагдана. Шүтөөнэй газарта бэе бэедээ муугаар хандажа, хоб жэб тараажа, тэбэрилдэжэ, таалалдажа, шангаар хөөрэлдэжэ, энеэлдэжэ, хэрэлдэжэ байдаггүй. Гороо хэжэ, хүрдэ эрьюулжэ, сахюусадта мүргэжэ, маани тарни уншажа, бэеэ соморхоноор абажа ябаха хэрэгтэй. Илангаяа хуралай уншалгын үедэ түлхисэлдэнгүй, бэе бэеэ хүлеэжэ, аргаахан ябажа, адис аршаанда хүртэхэ хэрэгтэй. Тиихэдээ наһатайшуулаа, бүһэтэйшүүлээ урид табидаг.
Дэлгэрэнгыгээр 17-дохи дугаарта.
