Шэтэ хото шадар оршодог Балдан hама сахюусантай Угдаанай «Содном Даржалинг» дасан арад зонойнгоо амгалан байдалай түлөө буянта хэрэгээ бүтээжэл байдаг юм. Сээнтэрэй, харгын авто-унаануудай шууяанһаа холохон оршодог шажанай гуламтада лама санаартан номгон байдалда албаяа хаадаг. Нютаг соогуур гараад, баруун хойшоо тэгүүлһэн харгыгаар унаагааршье, ябагааршье ябаһан зон дасан сэхэ хүрэжэ ерэдэг. Дасанай сахюусадта мүргэхэеэ, гороолхоёо ерэһэн һүзэгшэд, жиндагууд сахюусанай дуган руу ошоно. Баригдажа байһан олон байшангууд анхарал татана. Арбадахи дугаарай гэр соо шэрээтэ һуудаг гэжэ зонһоо һураад дүтэлхэдэ, ламхайда үзүүлжэ, хэрэгээ бүтээхэеэ ерэһэн зон олон байба.

Угдаанай дасанай шэрээтын шэрээдэ 1994 онһоо хойшо һуужа, санаартанай алба хаажа ябаһан гэбшэ Ринчинов Түмэн ламхайтай хѳѳрэлдѳѳ эмхидхэһэн байнабди.

 

Шэрээтэ Түмэн ламхай.

 

- Түмэн ламхай, Угдаанай дасанай мүнөөдэрэй ажабайдал, хараа түсэбүүд тушаа хөөрэжэ үгыт.

- Дасандамнай табан ламанар алба хаана. Хоёр оюутадтайбди. Тэдэмнай Ивалгын дасанда мүнөө һуража байна. Дулаан болоходо, барилгын ажал эхиеэ абаха. Жаганай байшан оройгүй, тэрэнээ хушалтатай болгохо түсэбтэйбди. Гол анхаралнай Согшон дуганай барилгада хандуулагдаха. Байгша ондо шажанай гуламтын һуурииень табяал һаа, манда ехэ байна. Урагшань 25 ба хойшонь 23 метр хэмжүүртэй талмайтай байшанай һууриин нүхэн малтаатай. Зундаа цемент шудхажа, һуури табихабди. Дуганай барилгада 12 сая мүнгэн хэрэгтэй. Хандиб үргэлгэ ябажа байна. Банкда манай дасанай тоосоон нээгдэнхэй. Тиишэнь һүзэгшэд, ажаһуугшад арга боломжоороо мүнгэ оруулна. Интернет соо минии хандалгатай уряалнууд таранхай (сайт угдан-дацан.рф). Мүнөө байгша Согшон дуган соомнай зон багтахаа болинхой. Ехэ хуралнуудай үедэ оройдоол гурбанай нэгэ хуби зон багтаха аргатайл даа. Бэшэниинь газаагуур ябаха. Анхан Согшон дуганаа шулуугаар бодхоохо һанаатай һэм. Шадалай байгаа һаань, шулуугаар барихабди. Мүнгэнэй хүрөөгүй һаа, нэгэдэхи дабхарыень шулуугаар баряад, бэшыень модоор бариха арга бии. “Шадалай хүрөөгүй һаа, байшанаа модоор баряарайгты”, - гэжэ дид хамба Цырен ламхай хэлээ һэн. Согшон дуганай барилгын бүтэхэдэ, һүзэгшэднайшье олон болохо. Угдаанһаа гаража ошоһон зон һөөргөө нютагаа бусаха. Угдаандамнай олон омогой зон ажаһуудаг. Ганса хориин 11 эсэгэнэрэй бэшэ, мүн бусад омогойхид бии. Тэдэнэй тоогоор дасанайнгаа хорёо соогуур хүрдэнүүдые хэһэн байнабди. Ондоо омогойт гэнгүй, бултыень нэрлэжэ, хүрдэ хээбди. Ерээдүй сагта Угдаанайнгаа дасаниие олон дугангуудтай, олон жиндагуудтай хийд дасан болгохо ехэ хараа түсэб бии.

 

Дэлгэрэнгыгээр 17охи дугаарта.

You have no rights to post comments