Ивалгын «Даши Чойнхорлин» дасанай Буддын шажанай университедэй ректор, гэбшэ Дымбрыл Дашибалданов тухай мүнөөдэрэй дугаарта хөөрэхэмнай.
Д.Дашибалданов.
ГЭБШЫН НАМТАРҺАА
Россиин Буддын шажанай заншалта сангхын XXIV бандида хамба лама Дамба Аюшеевэй захиралтаар, 2014 оной августын 31-эй үдэр Буддын шажа- най университедэй ректорээр гэбшэ Дымбрыл Дашибалданов томилогдоо һэн. Тэрэ Гоман дасанай дээдэ һургуулида 16 жэлэй туршада һураһан, 2012 ондо гэбшын зиндаа амжалтатай хамгаалаа.
Дымбрыл багша 1975 ондо Хориин аймагай Алан һууринай галзууд омогой Дашибалданов Гуробазарай бүлэдэ 10 хүүгэдэй одхон боложо түрэһэн. Дымбрыл Гуробазарович һургуулиин ябахадаа, эмшэн гү, али багша болохоёо һанадаг байгаа. Теэд абань хүбүүнэйнгээ 17 наһатай байхада, дасанда үгэжэ, лама болохыень зааһан байна. Тиин Дымбрыл хүбүүн хоёр-гурбан һарын туршада Анаагай дасанда ном шудалаа. Һүүлээрнь гурбан жэлэй туршада Ивалгын дасанда һураһан байна. «Монгол ороной Цыдендамба багша оршуулга заадаг, Булад багша уншалгануудые бүтээжэ һургадаг һэн. Сүлөө сагтаа хүбүүдтэй барилдажа, бэеэ һорихо дуратай байгаабди. Ивалгын дасанда һураһан үе эгээл гоё, хүхюутэй, һанаа амар саг байгаа», - гээд Дымбрыл багша дурсан һанана.
Энэдхэг руу хамта найман хубарагууд ошоһон байна: Агын, Анаагай, Асагадай, Ивалгын дасангуудһаа. Москваһаа Энэдхэгэй ниислэл Дели хото хүрэтэр самолёдто түлбэри дасан дааһан байна. Түрэл гаралнуудынь, аба эжынь харгыдань ехэ туһа хүргөө бшуу. Энэдхэгтэ тэдээндэ зааһан зарим багшанарые нэрлэбэл, гэбшэ һаарамба Тензин Чойпел, тиихэдэ Гоман дасанай хамба лама Лобсан Тенпа болоно. Түбэд хэлээр ядамаргүй, һайнаар дуугардаг һэн ха – номоо һайнаар үзэһэнэй, тиихэдэ түбэд багшанартай хөөрэлдэжэ байһанай үрэ дүн юм.
Дэлгэрэнгыгээр 17-дохи дугаарта.
