ГАНЖУУР
Ганжуур хурал Сагаан һарын хуралнуудай эхи табидаг юм. Мүнөө жэл энэ хурал февралиин 6-ай үдэр тудана. Үглөөнэй 10 сагһаа ба үдын хойно 15 сагһаа боти ном ламанарта болон хубарагуудта тараагдажа уншагдадаг. «Ганжуур» гээшэ 108 ботиһоо бүридэһэн ном. Тус ном соо Бурхан багшын наһан соогоо суглуулһан һургаалнуудынь оронхой.
АШАН
Февралиин 7-до үглөөнэй 6 сагһаа Ашан хурал эхилнэ. Энэ хуралай идамынь Жэгжэд бурхан болоно. Лама санаартан Жэгжэд идамые бисалгажа, Гомбо ба Чойжал сахюусадые дуудажа буулгадаг. Тэдэ сахюусадаа хүндэлжэ, магтаалнуудые уншаха, мүргэл хэхэ, тахилнуудаа үргэхэ. Энэ хурал хоёр үдэрэй туршада хамаг амитанай аршалагдахын ба буянай замда дайралдаһан һаад түбэг усадхахын тула хурагдадаг.
