Найман эрхэ сүлөө тухай
   Буддын шажанай ёһоор, хүнэй бэе хоёр газар боложо хубаарилагдадаг: эрдэни зэндэмэни ба юрын. Ямар аргаар бэеэ эрдэни зэндэмэни болгохоб гэһэн асуудалда харюу Чже Зонхобын «Ламрим Ченмо» ном соо толилогдонхой. Мүн интернедэй уудамда хүнэй үнэтэ наһан тухай статьянуудые оложо уншахаар. Статьянууд соо хүн боложо түрэхэ ба хүнэй наһанай шухала байһан тухай бэшэгдэнэ. Буддын шажанай суртаал ном үзэхын тула хүн найман эрхэ сүлөө олоһон байха ёһотой.
   Түрүүшын эрхэ сүлөө – тамада түрөөгүй байһандаа наманшалаад, иигэжэ бодомжолхо: «Урда наһандаа хэдэн дахин тамада түрөөб. Тэндэ түрөөд байгаа һаа, буддын шажанай һургаал үзэхэ аргагүйдэхэ һэм. Хожомынь хойто наһандаа баһал тамада түрэжэ болохоб. Тиимэһээ мүнөө хүнэй бэе олоод ябаа сагтаа буддын шажанай һургаал тон һайнаар үзэхэ ёһотойб».
   Хоёрдохи эрхэ сүлөө – бирэдэй орондо түрөөгүй байһандаа зальбараад: «Үлэнхэ һүнэһэдэй газарта байгаа һаа, ганса эдеэн, ундан тухай бодомжолжо байха һэм. Хүн боложо түрэһэндөө ехэ баярлажа, буддын шажанай суртаал ном уншаха хүсэл түрүүлхэ шадалтайб. Бэедээ шэнгээһэн эрдэмэй ашаар хойто наһандаа һайн түрэлдэ түрэхэ аргатайб», - гэжэ һанаха.
   Гурбадахи – амитанай бэе оложо түрөөгүйдөө наманшалха. «Мүнөө бэеэ эрдэни зэндэмэни болгохо аргатайб. Бэеэрээ, ухаагаараа, хэлээрээ хэдэг арбан хара нүгэлөө усадхахаб. Хойто наһандаа амитан боложо түрэхөө һананагүйб. Тиимэһээ буддын шажанай ном үзэхэб», - гэжэ бодохо.
   Дүрбэдэхи – сансарын бурхадай, али асууринарай газарта түрөөгүй байһандаа баярлаха. «Тэрэ газарта түрэхэнь аюултай. Тэндэхи тэнгэринэр наһанһаа нүгшэхэдөө, сэхэ тамада унадаг. Тиимэһээ дахяад хүнэй бэе оложо түрэһүүлби», - гэжэ наманшалха.

You have no rights to post comments