Цырендоржи Жамбалцыреновичэй мэдүүлһээр, Сагаан-Уула нютагта дуган бариха тухай хөөрэлдөөнүүд үшөө үнгэрэгшэ зуун жэлэй ерээд онуудһаа болодог байгаа. Теэд сагай эрхээр болон элдэб шалтагаануудаар дуганай барилга хэгдээгүй. Тиигэжэ хэдэн жэлэй үнгэрһэн хойно энэ асуудал дахяад бодхоогдоо.
   Тон түрүүн 2022 оной декабрь һарада нютагай захиргаанда багахан суглаан татагдажа, нютагай жоодшо, баряаша Пунцуков Мунко лама болон арба гаран хүн: наһатайшуул, эдэбхитэд, эмхи зургаануудай хүтэлбэрилэгшэд сугларжа, хөөрэлдөө хэһэн байна. Мунко ламын хөөрэһөөр, анхан Сүүгэлэй дасанай дэргэдэ хорин жэлэй туршада Агын буряадуудай ахалагша тайшаа ябаһан, Сагаан-Уула нютагай Түгэлдэр Тобоевой Жуд дуган байһан юм. Тиимэһээ Мунко лама тайшаа Тобын Түгэлдэрэй тоонто нютагта дуган бодхоохо тухай хүн зонһоо һураад, зүбшэлсөөд, Сүүгэлэй дасанай шэрээтэ Шойнхоров Алдар ламхайда хандаа ха. Тиигэһэниинь нютаг дээрэнь дуганииень һэргээхэ тухай Сүүгэлэй дасанда үнинэй хөөрэлдэдэг байжа, Алдар ламхай зүбшөөһэн байна.
   «Нютаг дээрэнь бүтээгээ һаа, бүри һайн байха. Аргатайл һаа, бүтээгты, бидэ зүбшөөлөө үгэнэбди гэжэ Алдар ламхай хэлээ. Удаань манай нютагайхидай дид хамба ламада ошожо һурахадань: «Түгэлдэр Тобоевой нэрэмжэтэ Жуд дуган бүтээхэдэ болоно бэд даа», - гэжэ Цырен ламхай-мнай зүбшөөбэ. Иимэ зүбшөөл абаад байхадаа, нютагайнгаа зонтой хөөрэлдэхэеэ баһа суглаа (сход) татабабди. Суглаан дээрэ хүн зомнай дуган бодхоолгодо булта зүбшөөлөө мэдүүлһэн байна.
   Бүхы юумэн мүнгэнэй хэрэг гээшэ ааб даа. Тиимэһээ 2023 оной үбэлһөө мүнгэнэй татабари эхилжэ, барилгын материал-нуудые аргаахан суглуулжа эхилээбди», - гэжэ нютагай захиргаанай толгойлогшо хэлэнэ.

You have no rights to post comments